ORANJESTAD – E siman aki Dienst Landmeetkunde en Vastgoedregistratie (DLV) a pone den uzo e posibilidad pa por paga a traves di POS machine. Pues por swipe of tap na momento di paga pa un servicio na e departamento. Di e forma aki DLV ta dal un paso padilanti den direccion di mehoracion di servicio na su clientenan.
Director di DVL, señor Leo de Cuba a splica cu ya pa basta tempo e departamento tabatin e deseo y e necesidad pa por brinda clientenan e posibilidad pa paga haciendo uzo di nan carchi di banco. E necesidad aki a bira mas na momento cu a wordo confronta cu covid. Pa por a logra e posibilidad di pago via POS Machine, DLV mester a cana un trayecto di adaptacion den e departamento pa por a intriduci esaki. E adaptacionnan ta encera infrastructura di tecnologia di comunicacion y tambe e applicacion cu ta uza pa administra e pagonan cu ta bay wordo haci a traves di e POS machine. Esaki a tuma un poco tempo pero awor por bisa cu a yega asina leu.
A pesar di contratiemponan cu a encontra, ta contento pa por bisa tur cliente cu bin haci uzo di servicio, cu nan por paga awo cu carchi. Pues no mester bin cu cash mas. Ta importante pa menciona cu e posibilidad pa paga cu cash ta keda te cu januari 2022 y despues di esaki lo pasa completamente pa pago a traves di carchi.
Pa termina Director di e departamento a gradici tur cu di un forma of otro a yuda den e proceso, tambe Minister pa duna e espacio necesario pa DLV yega asina leu y facilita cu CAD duna un bon apoyo y conseho pa yega na e punto aki. Tambe tur colega di DLV y banco RBC. Ta spera cu aworaki por a honra peticion di clientenan cu pa hopi tempo tabata desea esaki.
