Durante e reunion den Parlamento, Parlamentario Evelyn Wever-Croes a elabora riba e topico di nos hobennan. El a indica di ta traha cu un grupo di hoben y entre nan ta sinti e miedo cu nan tin pa extende nan famia, y pa inverti den pais Aruba.
Parlamentario Wever-Croes a splica cu a identifica 3 area hopi importante pa e hobennan, y ta spera cu e extra surplus por wordo uza pa e areanan aki. E tres areanan ta vivienda, disponibilidad di trabou cu nan ta haya interesante, y e gastonan envolvi na momento cu forma un hogar.
Vivienda
Hobennan awendia ta desea di tin nan mesun hogar. E no mester ta un cas grandi pero un apartamento of cas chikito pa nan por biba. Gobierno di Gabinete Wever-Croes a aloca mas di 20 miyon florin den presupuesto di 2025 pa FCCA por a cuminsa traha 100 cas, pero lamentablemente e Gobierno aki den e prome dia di trabou a scrap e 20 miyon aki y a pone como extra surplus pa paga debe.
E decision aki di Minister di Finansas Geoffrey Wever tabata uno hopi ekiboca, paso si a duna FCCA e fiansa aki, paso ta un fiansa e tabata, FCCA lo a traha e casnan aki y pa 2026, 100 famia lo tin nan propio hogar.
Disponibilidad di trabou cu nan ta haya interesante
Aruba su economia ta hopi “eenzijdig”, y ta wardando pa mas di 4 aña caba riba diversificacion di e economia. Actualmente no tin indicadornan pa mustra con hopi e economia a diversifica, y cuanto trabou nobo a traha pa nos hobennan. Nan ta desea un trabou pa asina por mantene nan famia.
Tambe nan ta remarca cu e hecho cu e gobierno aki tin un maneho di personal rond di e ministernan di personanan hopi dudoso cu antecedentenan penal hopi serio, ta duna e hobennan aki e gevoel cu esaki no ta bon pa nan. Parlamentario Wever-Croes a expresa cu esaki ta e motibo pakico su persona a haci e pregunta tocante e “hiring process” di esnan cu a trahando cu e ministernan, y si nan tin mester di e papel di buena conducta, paso si ta asina, ta hopi di esnan cu a sinta den Parlamento cu e ministernan te laat, lo no por tabata sinta eyden.
Gastonan
Un di e gastonanan cu ta referi na dj’e ta e “kresh toeslag”. Parlamentario Rocco Tjon, tempo e tabata minister a traha riba varios proyecto cu a bin cu diferente sistema di toeslag. Actualmente tin placa pa inverti of pa paga debe, pero no ta uzando e placa aki pa inverti den e ser humano cu tin mas mester di dj’e. No ta invertiendo den nos hobennan cu ta formando nan famia y mester di e sosten financiero.
“Nos hobennan ta importante, nan ta nos futuro generacion. Ban duna nan e speransa bek, ban yudanan pa crea e famia y e hogar cu tanto nan ta desea pa asina nan tambe por duna di nan parti pa hiba Aruba padilanti” Parlamentario Wever-Croes a expresa.
