Laga nos demostra cu berdaderamente, di profundidad di nos curason nos ta stima Dios, y cu Dios ta tur cos pa nos, y cu Dios tin e prome lugar den nos bida.
Senjor a duna nos autoridad Lucas 10:19: Mira mi a duna boso autoridad pa trapa riba colebra y scorpion, . Y riba tur poder di e enemigo y nada lo haci boso danjo.
Pesey laga nos stabilisa nos famia den oracion, ban haci tur locual ta posibel pa nos yuinan cana den e caminda di Dios, pa nan conoce e berdad, pa nan tin Cristo Hesus como nan defensa.
Pa nan no cay den trampa di droga y alcohol. Ni tampoco den trampa di inmoralidad y abominacion.
E adversidad satanico cu ta avansa full speed riba mundo ta obliga nos pa hala mas serca Dios, y sera tur porta cu e enemigo ta busca pa drenta, pasobra di berdad nos ta bibando den tempo trabahoso, pesey oracion den famia mester ta constant, pa asina nos confiansa crece den Dios ( Salmo 121).
Laga fieldad aumenta cada dia den nos matrimonio,
Laga esey keda demostra cu hecho y palabra.
Laga e homber stima su muhe,
Y laga e muhe somete na e homber,
Laga e homber ta cabes di su cas manera Cristo a ordena, no cu rebeldia y maltrato, tampoco cu manipulacion, pero cu e amor berdadero cu Dios a pone den su curason, pasobra esey boluntad di Dios.
Cada matrimonio mester ta un pilar di nos sociedad, pasobra hopi ta wordo papia di pilar economico, pero si e pilar social cu ta matrimonio y famia ta tambalia, e ora ey no tin forsa pa defende economia.
Union den famia ta necesario, pasobra e ta contribui na baha criminalidad, baha negativismo, y maldad bao di hubentud.
Y a yega e momento pa nos tur realisa cu sin yudansa di Dios, ta duro pa stabilisa famia y matrimonio.
Pesey laga nos ban bek urgentemente na e oracion den cas di tur famia, pasobra sin esey scuridad lo drenta, y nos tur sa cu e ladron a bini solamente, pa horta mata y destrui.
Laga cada hoben respeta su mayornan, obedece, honra bo tata y bo mama, pasobra hopi hoben ta cana den caminda robes pa falta di guia di nan mayornan, pa falta di respet y educacion cu tin cu bini netamento for di cas, pasobra caya no ta ofrece, respet, etica,norma pa bida, caya ta ofrece enganjo y decepcion.
Cuanto hoben a bira victima di e spirito di caya y no por encontra caminda pa cas, si un hende no papia cu nan di Dios y asina kibra e cadena di diabel cu tin nan mara.
Ta importante pa sinja nos hobennan haci oracion ya cu nos ta biba den un epoca digital, inteligencia artificial, caminda hende a lubida riba Dios y ta pensa cu tur cos ta bay automatico.
Pero no laga nos lubida cu Dios, ningun hende no por yam Dios Tata na telefon, ni voicemail, pero cu oracion, ayuno, clamor dedicacion y gradicimento, nos ta yega dilanti di su trono di gracia.
Nos mester perservera den oracion como famia, pa asina un sostene otro, pasobra esey ta demostra e union tan gusta cu ta bini di Dios.( Salmo 133).
Ban pone egoismo, odio, rebeldia, y falta di pordon un banda, y aserca otro den temor di Dios, pasobra eynan bendicion ta cuminsa, ora humildad ta presente den cas.
Perserverancia ta bini di Dios, e ta nifica depende di Dios, tur momento cu fe y confiansa cu Dios nunca lo bandona, Su yiunan.
Sinceramente,Pastor Marcel Balootje
