Diahuebs corte a trata e caso cu e scol di medicina, AUSOMA, a entabla contra Gobierno di Aruba y DIP. Tabata algun tempo pasa cu DIP a otorga na Ausoma e opcion pa asina por tuma over e dos scolnan, renoba nan, y usa nan como scol di medicina. E tempo ey Gobierno tabata buscando forma pa estimula movecion den Centro di Cuidad y e projecto aki tabata cuadra cu e vision di Gobierno. Kanaan Baroud di AUSOMA a haci tur lo posibel pa asina cumpli cu e opcion, pero el’a wordo obstaculisa dor di propio DIP, cu no tabata contesta su e-mailsnan y na dado momento DIP a informe cu el’a perde e opcion, pasoba e no a cumpli. AUSOMA ta nenga esey totalmente y ta bisa cu ta DIP a strobe di no por a cumpli, enbista cu nunca DIP a informe kico lo bira e huurprijs y sin un huurprijs e no por a entrega un estudio necesario. Corte a scucha ambos banda. E posicion di DIP tabata hopi swak. E projecto aki sigur tin su impacto riba economia di Aruba, ya cu lo atrea studiantenan international, pero tambe local pa studia medicina na Aruba mes. Studia na cas sigur tin su ventaha cu un studiante local no mester deal cu e cambio di pais y pa instala y establece su mes den otro pais. Pa fin di september corte a bisa di lo duna sentencia pa asina mira si lo obliga DIP na cumpli cu AUSOMA of lo finalisa e plan aki.
