Nos tin cu desaroya nos sector primario
Cuminda ta birando mas y mas caro na Aruba. No ta nada straño pasobra tur cos ta wordo importa. Pa colmo frontera cu Venezuela ta cera ainda causando cu no por importa fruta y berdura mas economico di eynan. Awe mas cu nunca Aruba mester desaroya su industria di agricultura.
Motibonan ta lo siguiente:
- Baha prijs: no mester importa, no mester paga prijs di carga/intermediario.
- Menos importacion di producto kiermen menos exportacion di divisa y placa ta keda lora na Aruba mes.
- Hisa calidad: door cu nos mes ta produci, nos ta prome den rij pa scoge esun miho.
- Mas independiente pa nos cuminda: nos lo depende menos di otro pais pa nos berdura, fruta, webo y cierto carni.
Recientemente mi a reuni cu sr. Gregory Fung a Fat, presidente di United Farmers Aruba (UFA) y sra. Giselle Lacle. Segun nan experencia y conocemento di y nan miembronan ta necesario pa varios departamento y/of gremio aporta na e industria di sector primario e.o. DIP, ELMAR, WEB, Douane, DWJZ, UvA y Comerciantenan Uni. Experencia na e momento aki ta cu no tur stakeholders ta riba mes un linea. Pa e vision por ta un exito, e mester wordo carga door di tur partners. Pesey nos autoridad riba tereno di sector primario, Santa Rosa, mester ricibi su hendenan, experticio y tools necesario, traha riba su “network” pa berdaderamente e por eherce su funcion pa cu un pilar economico nobo.
Pa nos por logra tur esaki nos mester tuma accion, e no ta bai di su mes. Accion di parti gobierno, departamentonan di gobierno, Parlamento, comercio y esnan cu tin e interes pa aporta cu e desaroyo. Un di e prome documentonan cu mester wordo traha ta un “meerjarenplan” door di Minister di Sector Primario.
