Diasabra mainta tempran, un gran cantidad di auto tabata den fila caba pa asina uni na e esfuerso di un Aruba mas limpi. E accion di Baki den Bario a bira un alivio grandi pa e comunidad. Por mira esaki den e exito di cada accion.
Un total di 455 vehiculo pa presenta pa asina haci uzo di e oportunidad di deshaci di nan sushi. San Nicolas y vecindario a prepara durante siman pa asina cu diasabra a yega, nan por a cuminsa transporta e desperdicio na e localidad asigna.
E biaha aki un total di 12 baki di SERLIMAR y 43 di Ecotech a keda uza durante e accion di Baki den Bario. Tur departamento y instancia cu ta froma parti di e accion aki tabata presente y asina coordina cu e team, como tambe Polis di Bario pa e miho fluho di trafico posibel.
Esaki lo tabata e penultimo accion di Baki den Bario. Durante siman lo anuncia cua ta bira e ultimo accion pa 2025. Mester tene na cuenta cu cada biaha ta scoge un localidad cu por acapara e accion aki, como cu e mester ta un veld grandi y cu accesibilidad facil pa e trafico.
Gabinete AVP-Futuro ta sigui haci su maximo esfuerso pa logra e limpiesa rond nos isla, den cada bario y cu cada accion ta yega cada biaha mas cerca di e meta aki. Comunidad tambe a sostene grandemente e iniciativa aki y ta haci bon uzo di cada accion di Baki den Bario.
Pronto lo anuncia tambe e ubicacion di e bakinan permanente rond nos isla. Esaki pa a brinda pueblo un luga fiho pa deposita desperdicio, sin costo alguno.
