E comerciantenan den Caya G.F. Betico Croes ta ansioso y prepara cu hopi energia pa dia 6 di juni, ora e prome edicion di Ban Bek Caya tuma luga. E evento ta un iniciativa di Gabinete AVP-Futuro pa duna bida nobo y trece mas trafico den Caya Grandi, un area cu por yega bek na su gloria di antes.
Ban Bek Caya lo tuma luga diabierna, for di 6 or pa 10 or di anochi, y lo brinda un ambiente vibrante y familiar pa un y tur. Durante e evento, hopi tienda lo ofrece descuento atractivo, y ta duna e pueblo di Aruba un bon motibo pa sali den famia y stimula e economia local.
E evento ta inclui 6 punto di ambiente cu entretenimento pa henter famia:
- Plaza Daniel Leo: DJ, Atanira, DJ Sky y DJ Devin
- Plaza La Linda: Tsunami y Shine Music
- Plaza Pro Fashion: Kids Corner, Dino Jump y musica pa mucha
- Plaza Nikki Habibe: Banda Chay y un ambiente unico cu Chubato Beer
- Plaza Djiespies: Banda Proost, caha di orgel “Olga” y baile cultural di “Nos Cultura” y Dazzling Dancers
- Plaza Comercio: Artesania local den bon ambiente cu NBO
Comerciantenan ta optimista cu e iniciativa Ban Bek Caya lo trece un multitud di hende den Caya Grandi y lo crea un impulso positivo pa e sector comercial.
Pa Gobierno di Aruba, comercio y organisacionan local, e mensahe ta cla: revitalisacion di Caya Grandi ta un responsabilidad di nos tur y Ban Bek Caya ta apenas e prome paso den e direccion aki.
Ban sali hunto cu famia y amigonan y disfruta di un anochi inolvidabel den nos Caya Grandi!
