FORTALEZA PA FAMIA.
Scirbi pa pastor Marcel Balootje.
E mihor ehempel pa nos hubentud ta nos cu como mayor , pasobra nan ta wak riba nos kico nos ta haci, con nos ta comporta, con nos ta regla nos asuntonan, ki tipo di bida nos ta biba, y mas cu importante cu tur , ken nos tin na prome lugar den nos bida, placa, material, idolatria of Dios.
E bida di respet cu nos ta biba, especialmente den nos matrimonio, tin un efecto masha grandi riba nos yuinan, cu nos mes no por imagina, muchanan tin hopi aterncion con nan mayornan ta trata otro den cas y tur caminda cu nan bay, pasobra e trato cu mamai y papai ta duna otro ta e ehempel di respet y desencia pa nan, pasobra educacion ta cuminsa na cas.
Ta aki nan tur cos ta cuminsa,pasobra si nos kier, pa nos yuinan lanta fuerte, cu balor y respet pa nan mes, cu disiplina y decensia , anto nos como mayor mester ta e testimonio di esey.
Rey David a bisa su yiu Salomon: Pa loke ta abo, mi yiu Salomon. Conoce e Dios di bo tata, y sirbie cu henter bo curason, y cu un alma boluntario, pasobra Señor ta scrudiña tur curason y ta compronde tur intencion di pensamento. Si bo busk’E , E lo laga bo hañ’E, ma si bo bandon’E ,E lo rechasa bo pa semper.( 1 Cronicanan 28:9).
Un tata por duna un yiu conseho, ora e mes tin experiencia cu Dios, ningun hende no por duna algo cu e mes no tin. Testimonio y educacion Spiritual di mayor tin mas balor cu e herencia cu nan ta laga atras di miyones di florin of propiedad pa nan yuinan, pasobra a base di Palabra di Dios, y testimonio di mayornan, yuinan ta scohe direccion pa nan bida.
Cuanto pleitamento no tin awendia pa herencia, ruman ta hiba ruman dilanti di Hues , rumanan ta sera curason pa otro, y laga , cas, of edificio bay perdi basta e otro ruman no haña nada, pero nan ta lubida cu locual nan ta pleita pe, ningun di nan a inverti un cen den dje.
Ta pesey e palabra di Dios ta bisa: Di mesun manera exhorta e hobennan pa nan ta huicioso, den tur cos presenta bo mes, como un ehempel den bon obra, cu puresa den doctrina, cu dignidad, cu palabra sano cu no por wordo condena, pa e oponente wordo brongosa sin cu e tin nada malo di bisa nos.( Tito 2:6-7-8).
Pasobra e gracia di Dios a aparece treciendo salbacion pa tur hende,siñando nos pa rechasa impiedad,y deseonan mundano, y pa biba huicioso y santo den e siglo presente. Wardando riba e speransa bendiciona y E aparicion di e gloria di nos gran Dios y Salbador, Cristo Hesus.( Tito 2:11-12-13).
Si nos como mayor no haci nos maximo esfuerso pa guia nos yuinan den caminda di Dios, decensia, respet y moral, ken lo hacie pa nos?
Hubentud mester sa cu nan curpa ta di respeta, pasobra e palabra di Dios ta bisa: Of boso no sa cu boso curpa ta e tempel di Spirito Santo, kende ta den boso, kende boso tin di Dios, y cu boso no ta pertenece na boso mes.Pasobra boso a wordo cumpra pa un prijs, pesey glorifica Dios den boso curpa.( 1 Corintionan 6:19).
Yuinan obedece boso mayornan den Señor, pasobra esaki ta husto. Honra bo tata y bo mama ( Cu ta e prome mandamento cu promesa) pa bay bo bon y pa bo tin bida largo riba tera,
Sinceramente, Pastor Marcel Balootje.
