E screening di Dios, ta wordo anuncia na grandi den Juan 3:16-19 y e ta wordo confirma den Juan 3:36.
Dios no ta chansa, Dios ta serio, fiel, berdadero y misericordioso, ta berdad cu tin separacion di estado y iglesia, pasobra si screening di hende pa goberna mester a tuma lugar segun e normanan di Dios, anto mayoria pais rond mundo lo no tin gobierno awendia.
Antes e lider di un pais mester tabata guia pa Dios, pasobra ora e lider purba goberna e pais sin Dios , hincando e pais den orguyo,idolatria,bruheria y malicia y asina aleha e pueblo for di Dios, e lider di e pais lo sufri e consecuencia, dilanti di tur hende, pasobra Dios mes lo atende cune. Wak kico a pasa cu rey Saul, Herodes, Salomon,Nabucodonosor, Acab, Omri, Nadab,Basaa.etc.
Awendia pica ta wordo trata como bida priva, pasobra durante oranan di trabao hende mester ta integro, pero despues di 5pm e por “Vive la vida loca”, pasobra ta su bida priva, pero no laga nos lubida cu serca Dios ningun hende tin bida priva, tur cos cu ta scondi, ta den claridad dilanti di Dios.
Pesey Bijbel ta bisa nos bon cla: No ganja boso mes Dios no ta laga ningun hende haci bofon di dj’E , tur locual un hende sembra e lo cosecha.
Dios a pone bon cla pa nos tur ken lo pasa Su screening y ken lo no pasa e screening,pa asina duna tur hende chens pa arepenti y busca cara di Dios.
Pero e diabel tin hende bon enganja, y cu wowo tapa, cu no kier tende ni mira e berdad, pero cu ta sigi den nan inmoralidad y bagamunderia, y haci como sifuera nan ta bon y Dios ta malo.
Den Galationan 5 :19-21 e palabra di Dios ta splica nos bon cla cu esnan cu ta participa den obranan di carni lo no hereda e reino di Dios.
Un biaha mas den 1 Corintionan 6:9-10, e palabra ta bolbe recorda nos cu e inhustunan lo no hereda e reino di Dios.
Den Romanonan 1:18-32 e palabra di Dios ta un guia pa nos tur, pa nos tin temor di Dios,Su principionan, y Su boluntad, pasobra tin consecuencia grave pa esnan cu a tende e palabra, pero ta trose e palabra, y asina haci locual cu nan kier, y hasta nan no ta hanja ta necesario pa reconoce Dios.
Y es mas e palabra di Dios ta bisa bon cla kico lo pasa cu hendenan asina.
Y den e ultimo buki di bijbel cual ta Revelacion, ora e huicio wordo presenta e ta bisa bon cla den Revelacion 20:15. Si un hende su nomber no wordo hanja scirbi den e buki di bida, e a wordo tira den e lago di candela. Esey ta di dos morto.
Awor mientras tanto nos tin e oportunidad , nos mester predica e evangelio di e reino di Dios, na tur hende, pasobra e palabra mes ta bisa, esun cu kere lo ta salba, pero esun cu no kere lo ta condena, pasobra e no a kere den e Yiu unigenito di Dios.
Ora hende ta spera algo y e no ta ricibi locual cu e a spera e ta wordo decepciona.
Awel tin un decepcion grandi mundialmente ta spera esnan cu boluntariamente a bay contra palabra di Dios, pensando cu ta contra hende nan ta bay of ta contra iglesia, misa, of tempel nan ta bay, pero na final di cuenta ta bin nota cu ta contra Dios mes nan ta rebeldia.( 2 Thesalonisensenan 2:1-12).
Sinceramente, Pastor Marcel Balootje
