Maldad ta aumentando den tur forma, hende ta inventa tur tipo di strategia pa haci malo.
Ta parcce manera nos ta den mesun tempo cu Genesis 6:5 den cual tur locual tabata biba riba curason di hende ta maldad.
Y den cada cos maldad ta inclui, hende a bira cu nan ta drumi loer pa wak con por haci danjo na otro, sea verbal of fisico, no ta importa si ta na hoben of hende grandi maldad ta wordo haci.
Maldad ta wordo propaganda manera ta algo bon, paisnan ta demostra strategia di gera con nan lo destrui otro, hasta demostra e tipo di arma cu nan ta bay usa, y bisa cuanto hende e por mata pa asina intimida otro.
Tur esaki ta obra di diabel, no ta boluntad di Dios, ta para scirbi cu ora nos Senjor Cristo Hesus su binida ta serca cu maldad lo aumenta, y awor nos tur ta mire, pasobra hasta serca nos mes e ta sosode. Maldad ta sconde den tur cos,pasobra tur caminda cu hende permiti diabel drenta, of laga porta habri pa e drenta e ta drenta y haci desaster (Juan 10:10).
Tur locual nos ta mira por ehempel:
E e aumento den uso di arma,
Uso di droga, uso di alcohol,
Aumento di divorsio,
Division den famia,
Rebeldia bao di hubentud,
Corupcion den politica,
Mentira na gran escala,
Danjamento di nomber di hende,
Noticianan falso y danino,
Aumento di bruheria,
Aumento di perversidad,
Aumento di ladronicia,
Y falta di pordon tur e cos nan aki ta bini directamenta for di e mundo di scuridad cu diabel ta maneha.
No lubida cu tur e cos nan aki ta locual ta wordo menciona den 2 Timoteo 3:1-5 pa locual ta tempo trabahoso, y tambe ta wordo presenta como obranan di carni den Galationan 5:19-21, y cu e palabra di Dios ta bolbe corda nos riba dje den 1 Corintionan 6:9-10).
Y consecuencia grave ta wordo anuncia den Romanonan 1:18-32 pa esnan cu ta trose e palabra di Dios y cu ta hanja necesario pa no reconoce Dios, y no ta kere den Su Yiu Cristo Hesus pa asina nan por yega na salbacion y bida eterna, pero ta prefera di rechasa of neglisha e bondad di Dios.
Santiago of Jacobo 4:7 ta para scirbi: Pesey somete boso na Dios, resisti e diabel y e lo huy for di boso.Hala serca Dios, y E lo hala serca boso.
1 Pedro 5:8 ta bisa nos tur bon cla: Sea sobrio, sea alerta. Boso adversario , e diabel, ta cana rond manera un leon cu ta grunja, buscando ken e por devora.
Ta tempo pa lanta ariba den oracion, y reprende satanas den nomber di Cristo Hesus, pasobra ta dificil trata maldad cu carisia, apoya maldad manera ta amistad, sera wowo pa maldad pa complace cu hende, tur e cosnan aki ta hala hende for di Dios, y frialdad spiritual ta drenta cu su consecuencia, cu hende no por reprende e enemigo pasobra nan contacto cu Dios ta kibra .
No ta tempo pa hunga cu pica, ni tampoco sostene maldad, huy for di inmoralidad, for di adulterio, nos particpa den obra di scuridad di ningun tipo.
Nos lucha no ta contra carni y sanger segun ta para scirbi den Efesionan 6:10-12. Pesey nos mester ta alerta den Oracion y bisti e armadura di Dios completo pa nos por ta fuerte den Senjor y den e forsa di Su poder.Pa nos por para firme contra e trampanan di diabel.
Ta tempo pa para firme den Fe, para firme den Oracion,sclamando na nos Senjor.
Sinceramente Pastor Marcel Balootje
