Rotaract Club ta contento y orguyoso di por presenta un otro edicion di e evento anual tan gusta cual ta ‘Pasa Pret cu Rotaract. Dia 27 di november Rotaract lo ta organisando e di 8 edicion di Pasa Pret cu Rotaract cu lo hiba e nomber di: Ban Keiro cu Pasa Pret cu Rotaract. E biaha aki e club hunto cu IBiSA a planea un ruta yena cu actividad na Eagle Beach unda nos muchanan por bin participa na dje y gana diferente premio. 

E evento aki, manera e edicionnan anterior, ta pa celebra dia internacional di mucha. E biaha aki a opta pa haci algo un tiki mas deportivo unda ta pone mas atencion pa promove un “healthy lifestyle” pa nos muchanan. Mayornan ta haña e oportunidad pa registra nan yiu(nan) cu ta na scol basico pa e evento di Ban Keiro cu Pasa Pret cu Rotaract na Fantastic Garden dia 21 di november . Cada mucho cu ta registra lo ricibi un tshirt cu nan por decora. Lo bai tin premio pa e tshirt cu ta mas creativo decora. Un biaha mas sponsornan a yuda pa asina haci posibel cu lo bai tin diferente premio cu lo bai wordo duna dia di evento mes. 

Ban Keiro cu Pasa Pret cu Rotaract lo tuma lugar na Eagle Beach. Mayor y participantenan lo topa cu voluntario di club na e parkinglot banda di Costa Linda unda nan lo ricibi un paspoort. Aki participantenan por cuminsa cu e ruta di actividad cu lo sigui te dilanti Amsterdam Manor. Na fin di evento lo bai tin un snack saludabel y awa pa tur participante. 

Rotaract Club of Aruba ta puntra tur cu ta bini dia 27 di november pa por favor mantene na tur regla di COVID-19 pa asina por percura cu tur hende ta keda safe. Pues, ta puntra pa toch trece bo tapa boca pa si cualkier motibo no por mantene distancia nos voluntarionan lo por pidi pa bisti esaki. 

Rotaract Club of Aruba kier gradici tur sponsor cu ta yuda pa haci e evento aki uno exitoso un bes mas: Amsterdam Manor Beach Resort, Pelican Adventures, Oranjestad laundry, Kok Optica NV, De Wit & Van Dorp, The Boolchands Group, AAA N.V. y tambe e gran cooperacion y guia ricibi for di IBiSA. 

Rotaract Club of Aruba ta un organisacion pa hobennan entre e edad di 18 cu 35 aña cu ta parti di e famia di Rotary Aruba cu ta consisti di Rotary Club of Aruba, Rotaract Club of Aruba, Interact Club of Aruba na Schakel College, Interact Club of Aruba na Colegio Arubano y Interact club Interact Club of ISA. Rotaract Aruba a wordo estableci na 1991 y desde principio ta organisa varios proyecto na bienestar di nos comunidad. 

Como club nos ta haya e proyecto aki di suma importancia mirando e situacion mundial di COVID-19 cu a resulta di ta hopi duro pa diferente famia na Aruba. Lamentablemente e intensidad di e virus aki no ta solamente e aspecto di financiero pero tambe mental y emocional. Pa e motibo aki Rotaract ta ofrece un evento social cu tur medida di seguridad pa celebra dia di mucha.

Nos ta spera di wak hopi mucha cu nan mayornan dia 27 di november pa 4or di atardi na parkinglot banda di Costa Linda. Pa mas informacion, Like y Follow e pagina di Facebook y Instagram di Rotaract Club of Aruba of subi nos website www.rotaractaruba.com.

LEAVE A REPLY

Please enter your comment!
Please enter your name here