Instrui e mucha den e caminda cu e mester cana, y hasta ora cu e bira bieu e lo no aparta su mes for di dje.( Proverbionan 22:6).
Ta hopi iresponsabel pa lanta un mucha sin e palabra di Dios, pasobra manera e tempo aki ta, bo ta hincando e mucha den un caya sin salida.
Mas tempran bo cuminsa educa bo yiu cu e palabra di Dios, mas bon pa e mes y pa henter famia.
Ta nos deber di cria nos yuinan, di duna nan tur cos cu nan tin mester pa un bon crecemento, pero tin algo masha importante, cu nos tin cu haci , y esey ta no lubida di sinja e mucha cu Cristo Hesus mester tin e prome lugar den su bida.
Na prome lugar e mucha su mente y curason mester ta dirigi e berdad, pasobra sin e berdad e ta biba den un confusion, y ta facil pa e enemigo domina su mente..
Palabra di Dios ta bisa den Filipensenan 4:8-9 finalmente rumannan:
Tur loke ta berdadero,
Tur loke ta honorabel,
Tur loke ta hustu,
Tur loke ta puro,
Tur loke ta bunita,
Tur loke ta di bon fama,
Si tin algun birtud,
Y si tin algo digno di alabansa, laga esakinan ocupa boso mente.
E cosnan cu boso a Sinja, y a Ricibi,Y a tende,y a Mira den mi, practica e cosnan aki, y e Dios di pas lo ta cu boso.
Como mayor nos mester pone enfasis riba e cosnan aki den bida di nos yuinan, pasobra solamente, asina nos por lanta mucha integro di bon karakter y cu bon actitud y cu hopi respet.
Ta masa importante pa locual cu nos ta sinja, nan por mire tambe den nos bida, pasobra ningun hende por duna algo cu e no tin.
Si nos kier respet, amor, disiplina y coreccion, esey mester wordo demostra den nos bida como mayor na prome lugar.
Nos mes como mayor mester cana den e berdad, biba cu e berdad, laga e berdad ta e guia pa nos bida, y asina nos por convense nos yuinan cu ta solamente e berdad ta haci hende liber.
Palabra di Dios ta bisa den 1Corintionan 14: 20; No sea mucha den boso pensamento,sinembargo sea mucha chikito den maldad, ma madura den boso pensamento.
Tur locual cu hende ta haci ta sali for di nan curason, for di curason ta sali cosnan bon, y tambe cosnan malo, pesey nos como hende grandi tin cu wak bon kico nos ta papia, y con nos ta anda, pa nos por ta un bon ehempel pa nos yuinan.
Un hende arogante lo lanta pleito, ma esun cu confia den Senjor lo prospera. ( Proverbionan 28:25).
Ta masha importante, pa nos tene na cuenta, cu ken nos yuinan ta anda, na unda nan ta bay, kico nan ta scucha y kico nan ta mira den e telefon. Ta masha importante un combersacion diario cu nos muchanan, pa asina aumenta nan confiansa cu nos y nos confiansa cu nan.
E hende misericordioso ta haci bon na su mes alma,ma e hende cruel ta tormenta su mes carni.( Proverbionan 11;17).
Laga amor ta sin hipocrecia. Aborece loke ta malo,tene firme na loke ta bon. Stima otro cu amor fraternal, duna preferencia na otro den honor.
Ta nos deber como mayor pa sinja nos yuinan stima, den un mundo yena cu maldad y inmoralidad, pa sinja nan wanta e compas di bida, cu solamente por wordo logra ora nos bista ta fiha riba Cristo Hesus, Esun cu tin tur poder y tur autoridad, riba nos. Sinceramente, Pastor Marcel Balootje
