Mescos cu Dios a institui matrimonio entre homber y muher , cual ta e unico cu Bijbel ta siña nos cu Dios a institui, Dios a institui Famia, cual ta cuminsa na un Tata, Mama y yui.
Sin falta respet pa opinion y pensamento di otro hende, pero tur otro tipo di matrimonio no ta bini di Dios, sino ta idea y pensamento di hende y biblicamente no ta carga e seyo di autoridad di Dios.
Tin algo masha importante cu hopi hende no sa, pero ta un exigencia di Dios, ora bo ta para como homber( lider) dilanti di bo famia:
Pa bo ta un homber di un solo muher.
Y di dos pa bo no ta mara na alcohol, tampoco arogante, violento , rabia,etc.
Pa bo tin un conducta drechi , decente huicioso, hospitalario,tur momento y tur caminda cu bo bay.
Ta imposibel pa bo tin dos cara y biba dos bida dilanti di Dios.
Awendia malisia y inmoralidad a drenta mundo , pero Dios su palabra no ta cambia.
Ora un homber ta casa y e ta pertenece solamente na su esposa, e Spirito di decencia ta reposa riba dje, y mesun Spirito ey ta goberna su hogar y su famia.
Asina un homber of muher casa cay den infieldad cu ta hiba na adulterio, e Spirito di decensia ta bandona e hogar y e porta ta habri pa tur clase di bagamunderia, tanto riba nan bida como riba bida di nan yuinan.
Pesey hopi hende no ta compronde di unda e kiebro di famia ta bini, y na unda e yuinan su rebeldia ta cuminsa, pasobra nan mes a trece desunion y no ta corda cu locual Dios a uni ta santo.
Un matrimonio ta uni riba un base di integridad celestial, cu Dios a establece, y asina hende bay haci cosnan cu ta contrario na Dios su palabra den nan matrimonio, ta bin consecuencia grave si nan no arepenti.
No ta algo inventa pero nos tur por mire den e cantidad grandi di caso di divorcio cu tin anualmente riba nos isla, combina cu abandono di hogar, y lagando yuinan desampara.
Pa esnan cu ta puro, tur cos ta puro, ma pa esnan cu ta contamina, y cu ta incredulo,nada ta puro,ma tanto nan mente como nan consenshi ta contamina. Nan ta profesa cu nan conoce Dios,ma cu nan hechonan nan ta nenga Dios,pasobra nan ta abominabel y desobediente, y nan no ta sirbi pa nada bon.( Tito 1:15-16).
Como hende ora nos ta lidera nos hogar y famia segun e diseño di Dios, nos mester tin alto respet, pa e institucion matrimonial cual ta e institucion humano mas halto cu Dios a establece.
Matrimonio no ta negociabel, no tin lugar den matrimonio pa ningun clase di infieldad, pasobra si un persona no ta fiel na su pareha , ta na ken e por ta fiel anto?Pasobra tur fieldad ta bini di Dios.
Esposanan sea sumiso na boso esposo, manera ta pas den Señor.
Esposonan stima boso esposanan y no sea amarga contra nan.
Yuinan sea obedecido na boso mayornan den tur cos, pasobra esaki ta agradabel na Dios.
Tatanan no provoca boso yuinan pa nan no perde animo.( Colosensenan 3:18-21).
Ta asina nos ta yega na un familia balansa den Cristo Hesus.
A yega e momento pa tur famia , nos busca cara di Dios, pa guia nos yuinan riba e bon caminda, di ordo, respet y temor di Dios.
Pasobra ta esey ta e deseo di Dios pa tur famia, pa Salbacion por alcansa tur hogar.
Sinceramente , Pastor Marcel Balootje.
