Tin hopi cos artificial ta sosode, cosnan den cual no tin ningun sombra di berdad, hende ta kere den mentira, kere den ilusion, rechasa palabra di Dios, ninga di reconoce Dios y permanece den scuridad ( Romanonan 1;28).Berdad ta wordo troci tur dia y hende ta prefera kere den mentira, cu kere den e berdad cu ta hiba na salbacion.
Nos ta mire na caminda caba, awor aki tin celebracion di Pasco y Anja Nobo,pero despues ta cuminsa cu e temporada caminda hende ta lubida riba Dios, lubida riba famia, lubida riba matrimonio,lubida riba yuinan, lubida riba responsabilidad , y habri porta pa tur sorto di cos cu no ta agrada Dios.
No ta pornada cu e palabra di Dios ta bisa den Hebreonan 12:2 : Fihando nos wowo riba Hesus e autor y cumplido di fe,Kende pa motibo di e goso poni Su dilanti a soporta e sufrimento di crus, sin haci caso di berguensa,y a sinta na man drechi di e trono di Dios.
Laga nos no cansa y perde fe y sucumbi pa materialismo, y inmoralidad, cual ta cos cu hende sa masha bon cu no ta agrada Dios, pero toch nan ta participa den dje, usando capa di cultura pa permanece den scuridad, pica, y bagamunderia.
Mayornan for di awor mensahe ta bay pa boso, wak bon pa boso yuinan, cu ken nan ta sali y na unda nan ta bay, cuidao cu keda drumi aki of aya, esaki ta conta tanto pa mucha homber y mucha muher.
Nos ta den tempo trabahoso, caminda nos oracion mester aumenta,y nos bista mester keda firme riba Dios, pasobra e palabra ta bisa cu diabel ta disfrasa na angel di lus.
Corda bon cu Hesus a bisa: Bin serca mi tur cu ta cansa y carga y lo Mi duna boso sosiego.( Mateo 11:28).
Kiermen no perde bo tempo buscando solucion riba bo mes, pasobra ta solamente den Cristo Hesus tin berdadero solucion y salbacion pa nos bida.
Wak un distraicion aki, un actividad cu bo mester bebe pa participa den dje, of mester bisti sunu pa particpa den dje, caminda bo ta wordo atrai pa tur clase di inmoralidad, caminda respet ta bay inmensamente atras. Awor un pregunta ta surgi bo ta kere di henter bo curason cu Dios ta envolvi den e asunto ey?
Tur e dolor y problema cu ta drenta den cas di famia, ta demostra cu Dios no ta den pasobra Dios no ta manda hende hinca nan curpa den problema, y Dios no ta tenta ningun hende, laga nos ta serio.
Tin hende cu a keda marca pa henter nan bida, tin cu a keda handicap, tin cu a keda sin matrimonio y sin famia, tin cu a keda cu stress y depresion pa locual cu nan a perde, y hasta cu a perde nan libertad y a keda anjos den prison.
Aki nan no tin nada di exagera, pasobra tur hende sa , no ta noticia inventa, tampoco inteligencia artificial, pero ta hechonan cu ta scirbi, bon relata den asuntonan di husticia, algo cu tur polis por bisa bo di dje, como persona pa bo cuida, pasobra cos por bay for di man, especialmente den trafico.
E uso di droga y alcohol, ta subi asina exagera, cu tur hende ta puntra ta na unda nos ta bay, especialmente bao di nos hubentud, pesey laga nos mantene nos hobennan den oracion.
Pesey mescos cu boso a ricibi Cristo Hesus e Senjor asina cana den dj’E.
Laga nos busca e cosnan di ariba caminda Cristo ta sinta na man drechi di e Tata.
Sinceramente, Pastor Marcel Balootje
