For di evangelio segun, Mateo, Lucas y Juan , nos por a ricibi e mihor noticia di nacemento di nos Senjor Hesus Cristo, un noticia cu a cambia direccion di mundo completo anunciando cu nos Salbador a nace.
For di e anuncio na Maria te na e momento di nacemento di Hesus ta bon noticia so a wordo comparti, noticia di obediencia, di humildad, di respet y di entrega total na e boluntad di Dios.
No tin mihor noticia cu mundo por a ricibi, pasobra e alegria cu e nacemento aki a trece, tabata sobrenatural, un milager grandi, pero tambe un demostracion grandi di e poder di Dios.
Pesey awor ta deber di nos tur pa mantene nos pasco bunita y alegre, pasobra e herencia aki ta pa awor y pa semper, no tin ningun acontecimiento mas grandi na mundo cu nacemento di nos Rey y Salbador.
Cada ken pone nan granito di amor den nan cas y nan famia, pasobra cu yegada di Hesus amor a yega.
Laga nos comparti cu otro, pa asina por tin pan na abundancia riba cada mesa, y paz den cada curason.
Cada dia nos ta keda mas convenci di locual ta para scirbi den Juan 10:10 : E ladron ta bini solamente pa horta, pa mata y pa destrui. Ami a bin pa nan tin bida y pa nan tin e na abundancia.
Esaki ta e lus berdadero cu ta lusa tur hende cu ta bin den mundo. (Juan 1:9).
E siguiente dia Juan a mira Hesus ta bini serca dj’E y a bisa’’ Ata e lamchi di Dios cu ta kita pika di mundo. Esaki ta Esun di Kende mi a bisa, despues di mi ta bini un homber cu ta prome cu mi.pasobra e tabata existi prome cu mi. (Juan 1:29-31).
E testimonio ta esaki, cu Dios a duna nos bida eterno, y e bida aki ta den Su Yiu. Esun cu tin e Yiu,tin e bida, esun cu no tin e Yiu no tin e bida.
Ta para scirbi den Isaias 7;14 : Pesey Senjor mes lo duna boso un senjal. Mira un birgen lo sali na estado, y lo hanja un yiu homber y lo dune e nomber Emanuel.
Isaias 9:6 ta para scirbi: Pasobra un yiu a nace pa nos, un yiu homber ta duna na nos, y e gobernacion ta riba Su schouder, Su nomber lo ta Consehero Maraviyoso, Dios Todopoderoso,Tata Eterno,Prins di pas.
Tur esaki ta pa identifica na nos ken ta bay nace, ta Yiu di ken e ta y kico e lo bin haci pa nos.
Awendia nos ta mira e adorno y lusnan bunita, cual comercialmente kier identifica e nacemento di nos Senjor Hesus Cristo.
Pero su nacemento a wordo identifica como un nochi di pas y nochi di amor, pesey nos tambe mester keda mantene e pas den nos curason y un goso berdadero pasobra ta pa nos motibo e a nace.
Awor cada persona mester ta consciente cu Pasco no ta alcohol, ni paranda, cu tur cos por wordo celebra desentemente y na ordo, no cu stuurmento burachi, ni tampoco cu violencia,pero cu pas y amor den cada hogar, pasobra ta esey e nacemento di Cristo Hesus a trece.
Maria y Hose a wordo usa grandemente pa Senjor, pasobra pa medio di nan , nos salbador a wordo cuida, te na momento cu e a entrega su bida na crus pa nos Salbacion.
E protocol di Dios , no ta manera esun di hende, pasobra pa Dios nada ta imposibel.
E ta nos Dios.
Sinceramente, Pastor Marcel Balootje
