E palabra di Dios ta bibo, e ta real, e no ta cambia, Cristo Hesus a bisa cu cielo y tera lo pasa, ma Mi palabra lo no pasa.
No tin ningun tipo di ganashi of sabiduria cu ta keda demostra ora nos papia malo di otro, of papia malo cu otro pensando cu asina nos ta crece un duim mas cu otro.
Palabra di Dios ta bisa: Morto y bida ta den e poder di lenga, y esun cu stima esaki, lo come su fruta.
Palabra danino ta trece frustracion, confusion, tristesa y ta descurasha esun cu ta scucha, pero tambe no ta obra pa bon pa esun cu ta papia, pasobra e lo perde confiansa y amistad.
Efesionan 4:29 ta para scirbi: No laga ningun palabra danino sali for di boso boca, sino solamente palabra, cu ta bon pa edificacion,conforme e necesidad di e momento, pa esaki por duna gracia na esnan cu ta tende.
Den tur sentido di palabra evita di pensa malo di hende, pasobra pensamento malo por haci cu bo ta trata hende malo, sin sa cu net eseynan ta bo hendenan.
Mal pensamento ta bini for di un curason cu ta formula maldad:E bon hende, for di e bon tesoro di su curason a saca loke ta bon,y e mal hende, for di e mal tesoro, ta saca loke ta malo, pasobra for di abundancia di curason boca ta papia. ( Lucas 6:45).
Tur mentira y tur falso testimonio ta pica, si bo tin un trabao den cual bo mester saca mentira y lanta falso testimonio, pa mantene bo posicion, mihor bo retira for di e trabao e spaar bo alma for di fierno, pasobra Dios ta odia mentira y especialmente orguyo y hacimento di redo.
Ora ta trata di educacion di nos yuinan, nos mester coregi, disiplina tur momento pa nan bienestar y pa esun di nos tambe, pasobra si nos no hacie, nos mes lo yora hunto cu nan, pero semper coreccion y disiplina mester tuma lugar cu control di nos palabra y nos hechonan.
Insulto por causa herida y dolor profundo, hopi biaha nos a yega di bisa cu insulto por stanca crecemento di un un mucha of por yega asina leu cu e mucha ta sinti su mes sin balor, pa motibo di e palabra cu su propio mayor a papia contra dje.
Laga boso palabra ta semper cu gracia,sasona cu salo, pa boso por sa con boso mester contesta cada persona.( Colosensenan 4:6).
Palabra cu ta sali for di nos boca como mayor mester por encurasha henter nos hogar, pasobra pesey nos tey, pa trece Fe, Curashi ,Amor y Pordon den cas. Nos trabao ta di lanta tur hende tempran mainta y encomenda e dia na Dios, pa asina tur hende den cas ta contento y nos ta riba e mesun nivel, sperando ansiosamente riba e bendicion di Dios pa e dia.
Asina e Senjor di ehercitonan a bisa: Administra husticia berdadero, y cada uno mustra carinjo y compasion na su ruman.Y no oprimi e buida,ni e werfano,e stranhero ni e hende pober, no plania maldad den boso curason contra otro. ( Zacarias 7:10).
Laga e palabranan di mi boca,y e meditacion di mi curason, ta aceptabel den bo bista, O Senjor, mi baranca y mi Redentor.( Salmo 19:14).
Papia berdad cu otro, mester ta un placer den nos bida, reconoce un logro di bo prohimo, mester ta un ganashi pa bo, celebra crecemento di bo ruman, mester ta fiesta den bo alma, pasobra asina nos ta demostra cu nos ta sirbido di Dios Todopoderoso.
Sinceramente, Pastor Marcel Balootje
