Den Genesis 1: 26-27-28 ta para scirbi pa tur hende por compronde lo siguiente:
E ora ey Dios a bisa; Laga nos traha hende segun Nos imagen, conforme Nos semehansa,y laga nan goberna riba e piscanan di laman, y riba e parhanan di laman y riba e bestianan di cria,y riba henter e tera,y riba tur bestia cu ta lastra riba tera.
Dios a crea hende segun Su mes imagen , segun e imagen di Dios E a crea hende:
Homber y muher E a crea nan.
Y Dios a bendiciona nan y Dios a bisa nan: Sea fructifero y multiplica, y yena e tera y haci esaki somete na bo:
Y goberna riba e piscanan di laman, y riba e parhanan di cielo. Y riba tur ser bibo cu ta move riba tera.
For di aki nos tur por compronde cu ningun clase di inferioridad no ta bini di Dios.
Inferioridad ta bini ora hende mes purba trece cambio den nan bida cu ta mishi cu nan bida spiritual y pone nan sinti nan mes inferior.
Ora un hende ta den adiccion di droga of alcohol, un mal influencia di inferioridad ta bini riba dje, pasobra e a purba di busca su goso den cosnan artificial, caba e palabra di Dios ta bisa claramente cu e goso den Senjor ta nos fortalesa.( Nehemias 8:10).
Den adiccion, hende ta cuminda degenera, tanto den karakter como fisico.
Hende ta cuminsa cana sushi, hole malo.
Hende ta pasa siman of luna sin banja.
Hende ta come kico cu ta.
Hende ta drumi na unda cu ta.
Nan tin cas pa biba aden pero ta rechasa nan mes hogar y nan hendenan pa biba riba caya.
Hopi di nan ta wordo poni riba caya pa motibo di nan comportacion.
Inferioridad ta yena hende cu duele y ta haci hende violento.
Nan ta cuminsa sinti inferioridad cu nan no por ta hunto cu otro hende pero nan mester ta nan so, of hunto cu esnan cu ta droga of bebe mescos cu nan.
Nan por wordo yuda, pero hopi ta combina droga cu rebeldia cu ta hiba na inferioridad y ta rechasa ayudo.
Mayoria di nan no tin dominio propio, cu ta pone nan sinti nan mes inferior.
Ora nan mente bin bek den obediencia completo na Dios na ta wordo libera.(2 Corintionan 10:3-5).
Asina hende kier anjadi algo cu no ta bini di e naturalesa di Dios, na su curpa, of den su mente, e ta bay sinti su mes inferior.
Tuma bon nota ora bo duna un mucha un bijnaam cu no ta muchu bunita, e mucha ta cuminsa sinti su mes inferior y hopi biaha actua inferioir door di e nomber cu bo a dune.
Cuanto mas ora bo bisa un persona cu ta den adiccion, cu e lo keda un adicto pa semper, esey kier men bo a pone un carga di inferioridad riba dje y si e kere locual bo ta bise e persona ey lo no cambia.
Pasobra segun e ,e ta wordo exclui di sociedad pasobra e a cay den adiccion, y asina e ta lubida cu e ta creacion di Dios, y cu Dios a trahe segun Dios Su imagen y semehansa.( 2 Corintionan 5:17).
Pica ta pone hende sinti nan mes inferior, imoralidad ta pone hende sinti su mes inferior, Dios nunca a traha dos calidad di hende, esey ta hopi bon splica den Genesis 1:26-27-28.
Laga nos reprende tur cos cu por pone hende sinti nan mes inferior.
Pasobra tur hende ta crea den imagen y semehansa di Dios.
Sinceramente, Pastor Marcel Balootje
