ORANJESTAD – Nos ta den un fin di siman na unda cu diabiera 13 di augustus a drenta e informacion di un total di 192 caso nobo y 1122 caso activo. Esaki ta un situacion hopi serio cu ta forsa Gobierno y Crisis Team tuma decisionnan pa asina purba contene y baha e contagionan y cu pronto nos por ‘flatten y crush the curve’ un biaha mas.

Durante Conferencia di Prensa di diahuebs anochi, Prome Minister a anuncia e cambio di maneho ta pa loke ta trata Covid-19: (1) Scolnan ta habri 1 di september 2021 cu excepcion di scolnan cu por habri online y crèche. (2) Entrante diabierna 13 di augustus, entretenimento den establecimentonan nocturno y fiestanan priva no ta permiti. Solamente ta permiti musica di background y maximo un musico.

Prome Minister Evelyn Wever-Croes ta encurasha cada ciudadano di nos pais, pa nos sigui cuida y mantene na e reglanan pa asina pronto nos sali for di e situacion aki.

“Nos ta enfrentando e mesun enemigo cu nos a enfrenta 13 di Maart 2020, numa cu un variante diferente. E mesun consehonan ta conta ainda pa enfrenta e enemigo aki, laba man frecuentemente, uza tapaboca, tene distancia y si bo tin un sintoma keda paden y yama bo dokter pa bo por haci un test.

Nos tin algun conseho adicional pa esnan di edad mas grandi of tin salud vulnerabel y esey ta limita bo movecionnan, no sali si no mester y no ricibi bishita si no mester. No tene fiesta na cas, especialmente esnan mas vulnerabel.

No pensa cu e hende cu bo ta bay topa no tin Covid. Es mas, prome bo topa cu ne, pensa cu e tin Covid pasobra e chens ta cu e tin’e pero ni e ni abo sa. No brasa, no sunchi, laba man y uza tapaboca.

Cuida e circulo di hendenan cu bo ta aden. Crea bo propio bubble. Mi ta cita akinan un dokter hopi stima: No bay trip cu ken cu ta cu bo no a wak den hopi tempo. Mi kier añadi; no bay trip mes.

Sa cu ken bo ta anda, sa ken bo ta topa cu ne. Bo no sa di unda e ta bin y bo no sa unda el a bay. Cantidad di casonan conoci aworaki, pasobra tin hopi hende cu tin’e cu no ta conoci, e chens ta hopi grandi cu entre awe cu mayan bo ta topa un hende cu tin’e y e no sa.

LEAVE A REPLY

Please enter your comment!
Please enter your name here