Recientemente den combersacion cu Sr. Diego Martijn, cual ta bibando algun tempo caba na Hulanda y a bishita famia na Aruba, a haya oportunidad pa toca algun tema cu a resalta durante su recorido rond nos isla.
Diego ta di Rooi Kochi y tin un coneccion y amor grandi pa cultura di su pais. Algo cu a resalta y sorpresa Sr. Martijn tabata e echo cu na e Monumento 18 di Maart, situa na Lagoen, e vlam cu semper a representa e monumento aki, no ta cendi mas.
E monumento aki tin su sentimento y balor personal, mirando cu na 1948, Aruba a entrega un mocion cu 2147 ciudadano balente a firma, na e conferencia di Mesa Rondo na Hulanda den cual a expresa e deseo pa Aruba haya su Status Aparte. Den e 2147 firmante, ta inclui Paulus Martjin y Genaro Rasmijn, ambos welo di Diego Martijn. Segun informacion cu Martijn a ricibi, e vlam aki no ta forma parti di e monumento mas debi cu gobierno anterior lo a considera esaki un gasto demasiado halto pa nan presupuesto.
E deseo lo ta pa wak e vlam aki cendi bek na e Monumento 18 di Maart. Di parti e famianan di tur esnan cu ta aparece riba e monumento aki, e ta un falta di respet cu no a tene den consideracion cu e vlam ta di gran balor pa cada nomber cu tin riba e monumento.
Diego Martijn ta di opinion cu ora ta trata di un momumento, no obstante cua partido ta na mando, e honor mester keda vigente. Cultura di nos pais tin su recuerdonan, e historia aki tin su balor y como parti di nos cultura mester tene esaki semper na halto.
Na final di dia ta un Aruba nos ta y e lucha di tur cu a firma, den cada bario, di cada famia, sin mira color politico, tin cu haya su debido respet.
