Gabinete di Minister Plenipotenciario a tene un biaha mas un exitoso Ban Topa cu studiantenan na Eindhoven. E encuentro aki tabata pa studiantenan for di e region di Brabant y Limburg cu ta inclui ciudadnan manera Tilburg, Breda, Eindhoven, Sittard y Maastricht. E Ban Topa aki por a conta cu mas cu 30 studiante.
E programa a cuminsa cu un discurso di Minister Plenipotenciario demisionario mr. Ady Thijsen den cual ela apunta e importancia di e encuentronan aki pa asina por mehora e guia di studiantenan na Hulanda. Tambe e mandatario a bolbe haci un apelacion riba e studiantenan pa nan pensa pa regresa Aruba despues di nan estudio. Sr. Thijsen a reconoce cu tin hopi trabao ainda pa haci diparti di e doñonan di trabao sea Gobierno of sector priva. Nan mester por brinda alternativa na studiantenan cu ora nan caba nan por haya trabao cu un bon salario y bon beneficionan secundario. ‘Aruba mester duna nos hobennan profesional un perspectiva pa regresa nan pais, cuminsa cu un carera profesional y asina cuminsa un biba na Aruba,’ tabata palabranan di Minister Thijsen.
E seccion di dialogo tabata den man di coordinadora di departamento di Enseñansa, Bienestar General y Cultura Ivonne Navas conhunto cu directora di Gabinete di Aruba Joselin Croes LL.M/M.Sc. Mescos cu den e casonan di e otro Ban Topa nan, aki a toca temanan manera e preparacion na Aruba; nan idea y pensamento riba e tarea di Gabinete di Aruba. Tambe a puntra e studiantenan ki tipo di actividadnan nan ta desea pa keda organisa; kico ta e retonan cu nan a bin ta confrontando na Hulanda.
Durante di e dialogo aki e grupo di studiantenan por a duna contesta riba e preguntanan y asina recohe pensamentonan, ideanan y sugestionnan unda Gabinete di Aruba lo por sigi traha riba maneho hunto cu ministerio di Enseñansa di Aruba pa stimula e desaroyo y bienestar di studiantenan Arubiano na Hulanda.
Gabinete di Minister Plenipotenciario ta hopi contento cu e Ban Topa na Eindhoven un biaha mas a confirma e nesesidad di tin dialoga cu e studiantenan pa asina sigi conecta y reforza y relacion entre Gabinete di Aruba y studiantenan Arubiano.
