E Gran Comission e mandato di Cristo Hesus cu ta para den tur e cuater evangelio ta conoci na nos tur.
Mateo 28:18-19 ta para scirbi: Hesus a hala serca y a papia cu nan bisando: Tur autoridad a wordo duna na Mi,den cielo y riba tera. Pesey bay y haci tur e nacionnan disipel di Mi, y batisa den nomber di e Tata y di e Yiu y di e Spirito Santo. Y sinja nan pa cumpli cu tur loke mi a ordena boso.
Mescos tin para den Marcos 16:15-16,bisando:Bay den henter e mundo y predica e evangelio na tur criatura, Esun cu a kere y a wordo batisa lo ta salba, me esun cu no kere lo ta condena.
E ta un yamada haci na tur esnan cu conoce Hesus Cristo, pa sigi hiba su palabra rond mundo manera E a manda nos, strobacion lo tin semper, oposicion lo lanta den diferente forma, e diabel lo hinca den bes di hende pa competi cu otro, ken sa mas, ken ta mas grandi, pero nos tur sa cu nos deber ta pa hiba e evangelio tur caminda cu nos bay.
Nos ta mira hopi triki di esnan cu ta laga e spirito di anticristo domina nan bida, esnan cu den un futuro lo tuma e marca , cual ta esnan cu no kier tende, esnan cu ta sera frontera di nan pais pa e Palabra di Dios.
Esnan cu keto bay ta kere den religion, y no ta wak cu nan relacion cu Cristo Hesus mester ta optimal.
Esnan cu ta bisa cu nan grandinan tabata asina y nan tampoco ta cambia, pero nan no sa cu e cambio no ta religioso, pero e ta relacional.
Tin hopi tambe ta kere cu nan ta pertenece na hende, y ta lubida locual Cristo Hesus a bisa Pedro: Simon, Pedro cuida Mi carnenan.
Ningun hende ta pertenece na ningun hende tur hende ta pertenece na Cristo pasobra ta Cristo ta e unico cu a muri na crus pa nos tur su salbacion.
Pesey e evangelio di Dios, mester wordo predica tur caminda pasobra ta para scirbi:
Con anto nan lo invoca Esun den kende nan no a kere? Y con nan lo kere den Esun, di Kende nan no a tende? Y con nan lo tende sin un predicado? Y con nan lo predica si nan no wordo manda?Manera ta para scirbi: Ki bunita ta e pianan di esnan cu ta predica e evangelio di pas, esnan cu ta trece noticia alegre di cosnan bon.( Romanonan 10:14-15).
Si nos tene cuenta con ciencia a aumenta, ya hende ta den mundo di robot, y hende kier reemplasa hende pa robot, amor di hopi hende a fria, hopi enbes di hala riba e caminda ta aparta for di e caminda di Dios.
Maldad di hende, malicia, inmoralidad,orguyo y amargura ta aumentando, y nos ta comprende cu esaki tambe ta senjal cu ta demostra cu e binida di Cristo ta serca, cu nos mester haci tur esfuerso pa e palabra yega tur caminda, den tur cas y den tur famia.
E palabra di Dios ta bisa bon cla cu lo tin spiritonan enganjoso y doctrina di demonjo ta moviendo y cu hende lo busca pa scucha locual nan kier y lo no acepta coreccion tampoco disiplina, pero kier biba un bida di libertinahe.
E tempo ta trabahoso, e dianan ta birando cortico, e maldad ta aumenta , pero tin un luz grandi na horizonte pa tur esnan cu ta kere.
No laga nada strobabo pa predica e palabra di Dios tur caminda.
Sinceramente, Pastor Marcel Balootje
