Tur cos ta posibel pa esun cu ta kere, locual ta imposibel pa hende ta posibel pa Dios.
Atrobe Mi ta bisa boso,cu si riba tera dos di boso bay di acuerdo tocante di cualkier cos, cu nan pidi,esaki lo wordo haci pa nan , door di Mi Tata cu ta den cielo.Pasobra caminda dos of tres reuni den Mi nomber ey Mi ta meymey di nan.( Mateo 18:19-20).
Ta tempo pa nos interes den oracion aumenta, ta tempo pa pone tempo pa Dios, stress , depresion, y despues problema di salud mental no ta respeta hende, pero un cos nos tur sa cu den e nomber di Cristo Hesus tin poder, y no lubida locual Cristo Hesus a bisa: Bin serca Mi tur cu ta cansa y carga y lo Mi duna boso sosiego.( Mateo 11:28).
Ta solamente Cristo Hesus por a expresa esey, pasobra den Cristo tin poder pa Salba, poder pa Libera,poder pa cambia bida di hende.
Ora nos corda con Cristo Hesus, a lanta hende for di morto, pone hende lam cana, e sordo tende, e ciego mira, saca demoño for di hende, nos tin di compronde cu nada ta imposibel pa Dios.
No ta tempo pa limita Su poder, pasobra E ta mesun Dios di ayera , awe y pa semper, Su poder nunca a mengua, y tur esnan cu ta kere den dj’E sa esey, Cristo Hesus ta nos Sanador.
Nos sa cu ciencia medico a aumenta, pero prome cu tur esey Dios tabata tey, pasobra Dios ta riba tur cos , E a crea tur cos, E a forma cada un di nos den barica di nos mama, y E sa exactamente kico nos mester, y si nos pidi y kere , nos lo ricibi milager.
Señor ta serca di e hende di curason kibra,y ta salba esnan di spirito abati.(Salmo 34:18).
E ladron ta bin solamente pa horta ,pa mata y pa destrui, Ami a bin pa nan tin bida, y pa nan tine na abundancia.(Juan 10:10).
Tin caso di stress y depresion, cu ta hiba na amargura, y despues problema di salud mental ta cuminsa, pasobra hende no kier pordona, nan no kier laga los di nan pasado, pasobra hasta envidia por hiba hende na stress, depresion,amargura y problema di salud mental.
Otro cosnan cu ta causante di problema cu salud mental ta, e metemento den bruheria, y hacimento di cosnan contrali na boluntad di Dios, tumando tratamento diabolico, cu no por drecha nada, pasobra nos curpa ta tempel di Spirito Santo, y e Spirito di Dios ta biba den nos, y cada biaha cu nos bay purba mescla cu cosnan diabolico e resultado lo no ta bon pa nos mentalmente.
Pasobra nos ta cambia e berdad den un mentira.
E uso di droga, cual tin hende ta bisa cu no ta haci nada, awe a keda demostra cuanto hende tin riba caya, cu a cuminsa hopi anja pasa, y awe nan mes no sa na unda nan ta , pesey ta un dolor ora nos mira hobennan ta cana cu un schoudertasje, cu marihuana y otro droga, cla pa bende y pa usa.
Ta pesey nos mester aserca e trono di gracia di Dios, pa haña pronto auxilio y ayudo na tempo, pasobra den un palabra bisa e Solucion ta Cristo Hesus.
Salmo 103:3-4 ta bisa:Kende ta pordona tur bo inikidatnan . Kende ta cura tur bo malesanan.Kende ta redimi bo bida for di destruccion. Kende ta corona bo cu misericordia y compasion.
No sera bo curason , Cristo Hesus tey.
Sinceramente, Pastor Marcel Balootje
