Botica di Servicio, conhuntamente cu CMB, Healthy Lifestyle Center Aruba y Subway, ta uni e aña aki pa organiza e di 7 edicion di Diabetes Run & Walk 2024 cu lo tuma lugar riba diadomingo, 10 di november 2024.
Den preparacion pa esaki, lo tin un Early Bird Event riba diabierna, 27 di september na Botica Eagle entre 5pm y 8pm. Durante e atardi aki, participantenan por pasa pa registra, haci pago y hiba nan dri-fit shirt!
Y eno ta para eynan – tur participante cu haci nan pago completo prome cu 27 di september y participa den e careda riba 10 di november, lo participa pa gana un weekend stay na Hilton Aruba Caribbean Resort & Casino.
Manera cada aña, e evento aki ta wordo organiza pa recauda fondo pa iniciativanan cu ta promove e prevencion di diabetes y tambe siña personanan cu diabetes con pa maneha e malesa aki di miho forma. No solamente esaki, pero tambe pa curasha y conscientisa e pueblo di Aruba tocante diabetes tipo 1 y tipo 2 en cuanto con esaki ta wordo maneha y preveni.
Diabetes ta sigui ta un problema serio riba nos pais, di cual e porcentahe di personan cu diabetes ta casi dobel e porcentahe di e populacion mundial. Mitad di pashentnan cu diabetes no ta ni na altura cu nan tin e malesa y no ta ricibi e atencion medico cu nan mester. Durante varios añanan, Botica di Servicio, hunto cu otro instancianan, a uni man pa trece conscientisacion di diabetes riba e isla di Aruba.
E Diabetes Run & Walk lo enfoca riba Jump18 pa di 2 aña consecutivo. Jump18 ta wordo maneha bou di Dr. Jamiu Busari, hunto cu su team di profesionalnan, kende ta brinda un programa pa muchanan como un iniciativa practico pa capacita e muchanan y nan mayornan pa mehora nan salud y bienestar.
Jump18 su obhetivo ta pa yuda tanto muchanan como na mayornan pa biba un bida mas saludabel, (re)educando y desafiando nan creencianan limitante pa medio di workshops y trece miho calidad di bida na tanto e muchanan como henter famia.
