Nos tur ta na altura locual ta pasando cu nos hubentud, nos tur sa con droga y alcohol y inmoralidad ta jaag tras di nos hubentud/
Nos no por tapa solo cu un dede, nos hubentud mester di apoyo di henter comunidad , pasobra sin e apoyo necesario, nan lo no por para firme.
Ta dificil lanta un hoben sin Dios, e palabra di Dios ta necesario,den bida di tur hoben, mas necesario cu cualkier ekipo digital.
E necesidad spiritual di un hoben , no por wordo reemplasa cu deporte, arte, y materialismo, pero ora hoben tin mester di Dios, ta di Dios e mester, y nos tur ta bon na altura cu tur nos hobennan tin mester di Dios.
E uso di arma di candela, e uso di droga y alcohol,e falta di respet y temor di Dios, ta simplemente algun motibo urgente pa nos pone man hunto y yuda nos hobennan.
Prome cos cu nos hubentud mester sa cu nan bida tin balor y cu nan no por biba manera nan kier, pero nan tin cu hiba un bida cu ta agrada Dios.
Pasobra e palabra di Dios ta bisa;
Boso no sa cu boso ta tempel di Dios, y cu e Spirito di Dios ta biba den boso. Si un hende destrui e tempel di Dios, Dios lo destrui e, pasobra e tempel di Dios ta santo, y esey ta loke boso ta.( 1 Corintionan 3:16).
E forma di biba di nos hubentud, sin ta tene cuenta cu ordo den nan bida, bibando bida di internet y pelicula ta afecta nan den tur sentido, pasobra locual nan ta mira nan kier haci y no ta tene cuenta cu nada.
E enemigo tin hopi trampa diabolico pa atrae nos hubentud, un di nan ta placa, otro ta pervesidad, y otro ta e rechaso di Dios, y asina e por hundi nan mas den scuridad.
No tin nada mas importante cu Dios den bida di un hoben, pasobra si un hoben ta studia y e no tin tempo pa Dios, ta djis un excuus pasobra Dios no ta kita ningun hende di studia. Alcontrario ta boluntad di Dios pa tur hoben studia y tin un bon trabao pa asina yuda nan mayornan.
E actitud y forma di bisti perverso, cu tin awendia, ta demostra cu nos mester pone hopi mas atencion riba nos hobennan na cas, pasobra educacion ta cuminsa na cas, y si na cas no tin ordo, anto e ora ey e hoben no ta respeta orden riba caya, cu tur e consecuencianan conoci.
Palabra malo. sushi, y baho no por ta e vocabulario di un hoben, esey ta nifica di biba un bida bao di nivel, di etica , moral y respet.
E comunicacion di custumber, bon dia, bon tardi, bonnochi,mester keda den e cultura di nos hobennan. Pasobra esey ta nos custumber di saluda otro.
Dios ta bolbe spierta nos den 1 Coruntionan 6:19 bisando: Of boso no sa cu boso curpa ta tempel di Spirito Santo, kende ta den boso. Kende boso tin di Dios, y cu boso no ta pertenece na boso mes.
Si como mayor nos no habri nos wowo, awor aki, den un paar di anja nos lo tin hopi di lamenta. Pasobra nos mes a habri man laga bay y tur cos ta sali for di man, pasobra no lubida cu e ladron a bini, solamente pa horta, mata y destrui.
Pa medio di hopi oracion y ayuno, buscando sabiduria di Dios, nos por alcansa yuda nos hubentud, pasobra placa no por cumpra desencia y moralidad.
Sinceramente, Pastor Marcel Balootje
