Pa prome biaha den su historia, Banco Central di Aruba (BCA) a habri su portanan pa comunidad cu un evento historico: ‘CONOCE BOBANCO CENTRAL ’. E actividad su apertura oficial a tuma luga diabierna 21 di november pa invitadonan y diasabra 22 di november 2025 a habri e actividad pa comunidad completo y a brinda un experiencia educativo y interactivo unda grandi y chikito por a descubri e rol esencial cu BCA tin den nos economia y comunidad.
E apertura oficial di e stacion ‘Nos Tesoro – Aruba su Florin’ a tuma luga diabierna 21 di november. Durante e apertura nos tabata tin e presencia di Gobernador di Aruba, Su Excelencia A.J. (Alfonso) Boekhoudt, hunto cu Presidente di BCA, Sra. Jeanette R. (Jane) Semeleer, den presencia di Prome Minister, Sr. Michiel G. (Mike) Eman, Minister di Finansas, Economia y Sector Primario, Sr. Geoffrey B. Wever, miembronan di Hunta di Supervision di BCA, y invitadonan.
Riba dia di e apertura a invita varios institutonan y organisacionnan pa experiencia e stacion ‘Nos Tesoro – Aruba su Florin’. E stacion aki a revela con e placa di papel di banco di awendia a wordo diseña for di e arte di concepto te na e produccion. Tambe bishitantenan a siña tocante e caracteristicanan principal di siguridad y a explora un coleccion di monedanan conmemorativo y di circulacion.
E dia di actividad pa comunidad henter, diabsabra 22 di november, a conta cu diferente stacionnan cu a ofrece e oportunidad pa grandi y chikito siña un poco mas di BCA. E stacion ‘BCA: Antes, Awo y den Futuro’ a conta cu varios presentacion di empleadonan y tambe, Presidente di BCA, cu a duna un miho bista ariba e tareanan di BCA y e plan strategico. E stacion ‘Cyber Operations’ a ofrece studiantenan di scol e posibilidad di experiencia un “hackathon” bou di guia di un experto internacional. Y por ultimo, e stacion di ‘Placa Sabi: Bo finansas den bo man’ a ofrece adultonan e oportunidad di sigui tayernan interactivo di expertonan cu enfoke riba presupuesto y spaarmento. Muchanan por a hunga cu weganan y puzzel relata na educacion financiero. Tambe tabata tin presencia di KPA, Brandweer, y Ambulance Zorg cu demonstracionnan di nan trabou pa publico.
A culmina e dia di actividad cu un donacion pa comunidad caminda a entrega cinco check na balor di Afl. 32.000,00 na Aruba Conservation Foundation, Stichting Koningin Wilhelmina Fonds Aruba, Neptali Henriquez Park, Fundacion Pa Nos Comunidad y Brighter Future Academy Foundation. E donacionnan ta sigui BCA su maneho di donacion, cu tin meta pa sostene proyectonan cu ta yuda fortalece bienestar di comunidad di Aruba.
Pa finalisa BCA ta gradici Kiwanis Club of Palm Beach Aruba pa nan colaboracion cu un cantina bon surti y tambe na e ekipo interno y externo cu a contribui na e actividad. ‘CONOCE BOBANCO CENTRAL ’ ta un muestra di BCA su compromiso pa integridad, sostenibilidad y responsabilidad pa comunidad.
