Banco Central di Aruba (BCA) a constata cu diferente entidadnan ta keda ofrece proposicionnan di inversion via medionan social, manera Facebook y Instagram, sin tin un permiso of dispensacion di BCA. Cada biaha, nan ta uza un metodo similar. Nan ta purba crea confiansa door di:

  • tuma trahadornan local den servicio, sin cu e entidad ta registra na Camara di Comercio y Industria Aruba; 
  • propone cu nan ta traha hunto cu banconan Arubiano, usando nan nomber y logo sin permiso;
  • propaganda nan mes den idioma local, uzando video clips cu por a wordo genera cu AI;
  • uzando nombernan (similar) di entidadnan existente. 

Nan ta propone rendimento hopi halto, of ta ofrece posibilidad pa inverti den cryptocurrency.

Pa sconde nan identidad, nan ta comunica via numbernan di celular cu ta cambia regularmente, Facebook Messenger y plataforma cu ta dificil pa rastrea manera Telegram. Ademas, regularmente nan ta crea un profiel of pagina nobo riba rednan social. 

Actualmente QuickPromo Aruba ta activo riba rednan social, sin cu tin un permiso of dispensacion di BCA. Wak e imagen abou:

E entidad aki no ta registra na Camara di Comercio y Industria Aruba, tampoco na BCA, y consecuentemente ta viola leynan di Aruba.   

BCA ta pidi pueblo pa no acepta oferta di inversion di QuickPromo Aruba y pa por fabor actua hopi cauteloso na momento cu wordo acerca via rednan social cu proposicionnan di inversion. Den caso cu a haci un transferencia na QuickPromo Aruba caba, BCA ta conseha pa entrega un denuncia na Korps Politie Aruba.