Durante e reunion di 22 di november 2021 y despues di a revisa dato economico y monetario mas recien, e Comite di Maneho Monetario (CMM) di Banco Central di Aruba (BCA) a dicidi pa hisa e porcentahe di e tasa di reserva obligatorio di 11,0 porciento pa 12,0 porciento entrante 1 di december 2021. E decision aki ta basa primordialmente riba e nivel halto di likides excesivo na e banconan comercial.

A considera e siguiente informacion y analisis pa yega na e decision aki:

Reservanan internacional

E reservanan internacional (incluyendo e diferencia di revaluacion di oro y reserva di divisa) a aumenta cu Afl. 586,9 miyon, te cu y incluyendo 5 di november 2021, compara cu fin di december 2020. E aumento aki ta debi principalmente na entradanan relata na turismo y fiansa di gobierno Hulandes na gobierno di Aruba mehorando asina su posicion di likides. Mientrastanto, reservanan oficial di divisa a nota un subida di Afl. 321,3 miyon. Consecuentemente, e reservanan oficial y e reservanan internacional a yega te na, respectivamente, Afl. 2.529,3 miyon y Afl. 2.943,6 miyon riba 5 di november 2021. Di e manera aki e reservanan a keda na un nivel adecua ora di compara nan cu e nivel critico di 3 luna di pagonan relaciona cu e cuenta coriente di e balansa di pago y e metrico di ARA di IMF (Grafico 1). 

Graifico 1 – Desaroyo den reservanan oficial y internacional.

Desaroyonan den credito

Den september 2021, credito total den e sector bancario a baha cu Afl. 78,0 miyon of 2,0 porciento te na Afl. 3.886,1 miyon, compara cu fin di 2020. Esaki ta debi na e componentenan ‘credito na empresa’ (-Afl. 33,3 miyon of -2,2 porciento) y ‘credito na individuo’ (-Afl. 30,8 miyon of -1,6 porciento). E categoria ‘credito na individuo’ a cay pa motibo di un demanda mas abou pa credito na consumidor, mientrastanto e componente ‘credito na empresa’ ta impacta door di menos hipoteca comercial y fiansa riba termino di menos di of igual na dos aña.

Inflacion

Na september 2021, e Indice di Prijs di Consumo (CPI) tabata 2,2 porciento mas halto compara cu e mesun luna di e aña anterior (Grafico 2). E promedio anual di e tasa di inflacion a alcansa -0,7 porciento na september 2021, 0,4 porciento mas halto cu e luna anterior. E subida den CPI compara cu e aña anterior ta primordialmente door di crecemento den prijs den e componentenan di ‘transporte’ y ‘mobilario’. E promer ta relata na e aumento den prijs di gasolin, mientras cu e ultimo probablemente lo ta relata na e escasez global di suministro. 

Grafico 2 – Inflacion

Likides di banconan commercial

E total di likides excesivo na banconan comercial a subi te na Afl. 1.308,3 miyon na september 2021, compara cu Afl. 1.107,4 miyon na december 2020 (Grafico 3). 

Apesar di esaki, un comparacion mensual a demonstra cu e total di likides exesivo a baha di Afl. 1.508,3 miyon na augustus 2021 te na Afl. 1.308,3 miyon na september 2021. E caida aki ta debi na e subida den e tasa di reserva obligatorio desde 1 di september 2021 y e subida den e asina yama “prudential liquidity ratio” di 15 porciento na 18 porciento desde e mesun fecha. E crecemento den e tasa di reserva obligatorio y e asina yama “prudential liquidity ratio” minimo a wordo mitiga pa un expansion den e nivel total di fondonan di likides na e banconan comercial. Consecuentemente, e nivel di likides excesivo a keda halto y significantemente riba e nivel prome cu pandemia (Box A).

Box A: Kico ta likides excesivo di banconan comercial y dicon esaki ta importante? 
E total di likides excesivo di e banconan comercial ta indica e likides disponibel den e sistema bancario cu ta surpasa e nivel minimo rekeri (esta, den termino di e tasa di reserva obligatorio y e asina yama “prudential liquidity” minimo). Di e manera ey, ta calcula e likides excesivo door di kita e reserva obligatorio y e likides minimo prudencial for di e fondonan di likides.
Likides excesivo ta permiti e banconan comercial pa acumula reserva di likides. Ta uza esaki pa acomoda demanda pa credito y ta fungi como respaldo durante crisis financiero y economico. Sinembargo, un nivel demasiado halto di likides excesivo por stroba e conducta di maneho monetario como cu e ta baha e efectividad di e mecanismo di transmicion di maneho monetario door di menos abilidad di BCA pa influencia e otorgamento di credito door di banconan comercial. 

E nivel amplio di likides excesivo ta parcialmente causa pa e bahada den e tasa di reserva obligatorio y e asina yama “prudential liquidity ratio” minimo entrante maart y april 2020, formando parti di e medidanan di alivio riba tereno monetario y prudencial pa asina mitiga e efectonan di e pandemia di COVID-19. Ademas, otro factornan cu ta contribui na e crecemento continuo den likides excesivo di e banconan comercial ta e falta di demanda pa credito y e aporte di FASE y subsidio di salario duna door di gobierno di Aruba pa mitiga e efectonan  economico di COVID-19.

Consecuentemente, e asina yama “prudential liquidity ratio” di e banconan comercial, cual ta midi e porciento di activo likido compara cu e activo total netto di e banconan comercial, a keda na un nivel comfortabel den september 2021 (38,3 porciento), basta mas halto cu e asina yama “prudential liquidity ratio” minimo rekeri di 18,0 porciento. 

Anticipacion di salida di divisas a consecuencia di e revocacion di medidanan riba divisa di BCA

Apesar cu e nivel di reservanan oficial y internacional ta adecua, BCA ta anticipa un crecemento den e salida di divisa como resultado di e revocacion completo entrante 1 di september 2021 di e restriccion nan introduci anteriormente. Ta calcula cu un total di Afl. 252,5 miyon lo sali pa fin di 2021, basa riba ultimo proyeccionan. 

Banco Central di Aruba

LEAVE A REPLY

Please enter your comment!
Please enter your name here