Banco Central: E resistencia di e sector financiero na Aruba ta keda firme, tambe durante e nivelnan sin precendente actual di stress causa pa covid-19

333

COMUNICADO DI PRENSA

E RESISTENCIA DI E SECTOR FINANCIERO NA ARUBA A KEDA FIRME, TAMBE DURANTE E NIVELNAN SIN PRECEDENTE ACTUAL DI STRESS CAUSA PA COVID-19

Awe Banco Central di Aruba (BCA) ta publica su FINANCIAL SECTOR SUPERVISION REPORT 2019.

BCA ta e unico autoridad supervisorio di e sector financiero na Aruba. E “Financial Sector Supervision Report” ta un rapport prepara segun ley, y presenta na Minister di Finansas prome cu 1 di juli tur aña. Den e rapport aki BCA ta duna un bista di su actividadnan principal cu el a ehecuta y decisionnan mas importante cu el a tuma riba e tereno di maneho durante di e aña concerni den e implementacion di e ordenansanan di supervision, incluyendo e leynan pa preveni y combati labamento di placa y financiamento di terorismo. E rapport aki ta describi tambe e accionnan principal tuma door di BCA pa sigui reforsa e marco legislativo y regulatorio. Banda di un resumen di e ultimo desaroyonan riba e tereno internacional di supervision, ta discuti e desaroyonan principal den e sector financiero domestico.

Aunke cu e rapport di 2019 ta focus mas tanto riba e desaroyonan cu a tuma lugar den 2019, e tabata inevitabel pa refleha tambe riba e posibel impacto di e pandemia di COVID-19 riba e sector financiero. Mescos cu na otro paisnan, Gobierno di Aruba a tuma medidanan drastico pa mitiga e brote di e virus riba e isla, incluyendo e seramento di su fronteranan. Pa mitiga e impacto economico di e virus COVID-19 riba e economia di Aruba como tambe e sector financiero, BCA a tuma medidanan rapido den e dominionan monetario, supervisorio, y di divisa pa asina por a amplia e likidez y e capacidad pa absorba perdida di e banconan comercial, y pa proteha e reserva di divisa internacional. E medidanan tuma ta cu e meta pa segura un bon funcionamento di e mercado di credito bou di condicionnan di stress. Apesar cu na momento di publica e rapport aki no tin indicacion cu e sector financiero lo no por carga e shock financiero cu lo surgi di e pandemia di COVID-19, tin ainda basta incertidumbre riba e impacto total di e pandemia aki riba e economia di Aruba como tambe su sector financiero. E prueba di stress cu a wordo haci riba e sector bancario comercial den cuadro di e pandemia di COVID-19 ta mustra cu e impacto lo por ta bastante significante, pero e capital amplio y e buffernan di likidez ta duna e banconan suficiente espacio amplio pa por navega door di e tormenta sin precedente economico aki.

Manera den e añanan anterior, BCA su actividadnan di supervision principal den 2019 a consisti di inspeccionnan ehecuta periodicamente na e institucionnan bou supervision mes pa asina evalua e riesgonan mas grandi y e cumplimento cu e ley- y regulacionnan vigente, como tambe e vigilancia continuo riba distancia (e asina yama “off-site surveillance”). E “off-site surveillance” ta inclui analisis di e rapportnan financiero obligatorio cu e institucionnan bou supervision ta entrega periodicamente na BCA y e reunionnan bilateral teni cu nan.

Den casonan necesario, BCA ta aplica instrumentonan na su desposicion pa efectivamente enforsa cumplimento cu e ley- y regulacionnan di supervision. Den casonan unda BCA ta identifica situacionnan serio di incumplimento cu e ley y regulacionnan di supervision, e por considera pa tuma medidanan formal. Na 2019, un total di 45 medida formal a wordo tuma (24 mas compara cu 2018). Den 36 caso a impone multanan administrativo, den 4 caso a emiti instruccion formal (e asina yama “aanwijzing”) pa remedia e deficiencianan registra, y a impone e asina yama “last onder dwangsom” den 5 caso.

BCA ta aplica un metodologia basa riba riesgo den ehecucion di su tarea di supervision, unda cu e ta aloca e parti mas grandi di su recursonan di supervision na e institucionnan y areanan cu e perfil mas halto di riesgo (p.e. e portfolio di fiansa y inversion, e asina nan yama “governance”,  “risk managment “, y “compliance “). E metodo aki, hunto cu BCA su maneho estricto di enforsa y su compromiso continuo pa cumpli cu e normanan mas halto y e mihor practica den e area di regulacion y supervision di e sector financiero, tabata instrumental den mantencion di e solides y reputacion di e sector financiero di Aruba.

E rapport di supervision di e sector financiero ta indica claramente cu durante 2019 Aruba su sector financiero a keda solido, rendabel, y sumamente resistente na shocknan. E crisis economico actual induci pa COVID-19 un biaha mas ta demostra claramente e necesidad di tin capital amplio y buffernan di likidez pa por navega den tormentanan sin precedente. E tasanan prudencial agrega di e sectornan bou supervision a keda den e margennan adecua. E tasa di prestamonan den un situacion di incumplimento (e asina yama “nonperforming loans ratio”) di e banconan comercial a sigui baha, esta for di 3,9 porciento na final di 2018 te na 3,0 porciento na final di 2019. Ademas, e “stress test”, cu ta haci anualmente riba e sector bancario domestico, a demostra cu e asina yama “risk-weighted capital ratio” y “prudential liquidity ratio”, cualnan tabata 30,9 porciento y 29,3 porciento, respectivamente, na final di 2019, ta suficiente pa por absorba shocknan externo significante.

Manera den añanan anterior, BCA a sigui haci esfuersonan pa enforsa e marco regulatorio door di emiti reglanan y guianan nobo of revisa esunnan existente. Por haya un recapitulacion di e desaroyonan mas significante den e area aki den capitulo 3 di e rapport aki. Sin kita afor di loke a menciona anteriormente, un biaha mas BCA ta haya cu ta importante pa remarca e importancia di tratamento di e propuesta di revision di e Ordenansa riba Prevencion y Combatimento di Labamento di Placa y Financiamento di Terorismo door di Parlamento di Aruba mas pronto cu ta posibel, tambe tumando na cuenta e proximo evaluacion di Caribbean Financial Action Task Force (CFATF) riba e efectividad di Aruba su marco pa combati labamento di placa y financiamento di terorismo. A pospone e evaluacion di CFATF door di COVID-19 y awor e lo tuma lugar probablemente na inicio di 2021.

Pa conclui, e aplicacion estricto y consistente di e ley- y regulacionnan di supervision y di e prevencion y combatimento di labamento di placa y financiamento di terorismo den e transcurso di e añanan a contribui na mantene un sistema financiero stabiel, cu bon reputacion y sano, na Aruba.

E FINANCIAL SECTOR SUPERVISION REPORT 2019 ta disponibel for di awe riba e website di BCA www.cbaruba.org.