Fraccion MEP a haci preguntanan por escrito na e minister di Asuntonan Economico, Geoffrey Wever, a base di e reciente Economic Outlook Real Sector, September 2026 di Centrale Bank di Aruba (CBA).
Aunque CBA ta spera un crecemento economico real di 3,7% pa 2026, nan ta pronostica un reduccion alarmante desde 2027. E crecemento ta wordo calcula na 2,3% na 2027 y ta baha gradualmente te solamente 1% na 2030. MEP ta puntra e minister con e ta evalua e desaroyo aki y si gobierno ta mira esaki como un riesgo structural pa e economia di Aruba.
Fraccion MEP tambe ta pidi claridad tocante e consecuencia di esaki pa empleo, entrada di ciudadanonan, entrada di gobierno y caildad di bida di nos comunidad. Tambe ta wordo puntra cua sector gobierno ta mira como futuro motor di crecemento y con Aruba por bira menos dependiente di consumo y turismo.
INFLACION, OTRO ALARMA
Un otro punto di atencion ta inflacion. CBA ta premira cu inflacion lo subi di 0,1% na 2025 pa 2,4% na 2026, entre otro pa causa di prijs mas halto di petroleo. MEP ta puntra cua ta e posibel impacto riba poder di compra y cua medida gobierno ta tuma pa reduci e impacto na Aruba.
Finalmente, MEP ta puntra cua ta e solucionnan structural pa preveni cu Aruba ta drenta den un periodo di crecemento economico abou rumbo 2030. A puntra tocante medida concreto pa diversificacion economico, productividad, innovacion y competitividad.
Cu e preguntanan aki, Fraccion MEP kier haya claridad tocante con grandi e reto economico ta y cua plan concreto gobierno tin pa garantiza crecemento duradero y poder di compra pa Aruba.
