Banco Central di Aruba (CBA) a tuma nota di comentario publico di Sr. Waslander den Bon Dia Aruba riba 17 di april tocante e nivel adecua di reserva di divisa y stabilidad monetario den contexto di desaroyonan global, specificamente e tarifanan riba importacion imponi door di Merca den ultimo cuater siman. Aunke Aruba ta un isla chikito cu un economia habri — y ta impacta door di desaroyonan global — e base monetario domestico ta solido. CBA ta enfatisa cu e tasa di cambio fiho entre e florin cu e dollar Mericano ta solido y stabiel, sosteni pa e posicion fuerte di reserva di divisa di CBA. Mantencion di e tasa di cambio fiho aki ta e meta principal di e maneho monetario di CBA.
Ta importante pa menciona cu maneho monetario bou di un regimen di tasa di cambio fiho ta diferencia di un regimen di tasa di cambio flotante. Aruba ta opera bou di un regimen di cambio fiho cu e dollar Mericano. Den caso di Aruba, instrumentonan monetario y decisionnan di maneho ta dirigi principalmente na mantene e credibilidad y sostenibilidad di e cambio fiho entre e florin y e dollar Mericano, en bes di maneha inflacion of tasanan di interes activamente manera den un regimen flotante. Pa mantene e stabilidad aki, un maneho prudente di (cantidad di) reserva di divisa ta un instrumento primordial di maneho monetario di CBA.
- Posicion Fuerte di Reserva: Reserva di divisa oficial y internacional ta sigui surpasa metriconan di nivel di reserva reconoci y uza internacionalmente. Na final di maart 2025, e metrico di International Monetary Fund (IMF) Assessing Reserve Adequacy (ARA) tabata na 132,8% y a permanece ariba di e ratio minimo rekeri di 100%. Esaki ta nifica cu tin un ‘buffer’ di reserva di divisa pa por absorba fluctuacion economico internacional. Ademas, e ratio di cobertura di cuenta coriente tabata 7,9 luna di pago di cuenta coriente, ampliamente riba e referencia di cobertura di 3 luna.
- Base economico domestico stabiel: Indicadornan principal, incluyendo inflacion abou, crecemento di credito stabiel, y un sistema financiero solido, ta refleha e resiliencia di e economia y ta sostene e efectividad di e maneho monetario y financiero actual.
- Maneho basa riba data: Tur decision di maneho monetario ta basa riba un marco di maneho analitico robusto. E marco di maneho monetario aki ta basa riba un evaluacion amplio y continuo di varios indicador domestico y internacional, normanan di reserva adecua, desaroyonan di e sector externo y stabilidad di e sistema financiero. Como un economia chikito y habri, Aruba ta sensitivo pa tendencianan economico mundial, incluyendo dinamica di comercio y tensionnan geopolitico. Esaki ta nifica cu adaptacion di pronostico economico ta parti integral di trabou di CBA. Es mas, CBA ta monitor continuamente desaroyonan global pa garantisa cu e maneho monetario ta keda receptivo y efectivo den e mantencion di stabilidad monetario y financiero. CBA ta comprometi na proteha e stabilidad di balor di e florin, mantene confiansa monetario y sostene un sistema financiero saludabel.
CBA ta invita gremionan y publico pa consulta su publicacionnan oficial pa informacion corecto y alcaso.
Por haya decisionnan di CBA su Monetary Policy Committee (MPC) na Monetary policy decisions – Centrale Bank van Aruba
Pa mas informacion por bishita Centrale Bank van Aruba – Home of email: communications@cbaruba.org
