ORANJESTAD: Tabata diabierna ultimo cu Banco di Caribe y su Personeelsvereniging (PV) a haci un bishita na Fundacion Pa Nos Comunidad (FPNC). Durante di e bishita aki a haci entrega di productonan di prome necesidad di manera cu e fundacion por sigui sostene comunidad di Aruba.
Tocante FPNC
E fundacion cu a keda lanta na 2009 ta enfoca riba alivia hamber, brinda ayudo structural y holistico pa combati pobreza, crea manera pa hogarnan mas vulnerabel den nos comunidad participa y re-integra. Ademas di esaki, e fundacion ta colabora cu otro organisacionnan cu e mesun causa y brinda ayudo humanitario teniendo cuenta cu derechonan universal. FPNC ta yuda mas cu 40 instancia cu mes un proposito.
Ayudo na Comunidad
FPNC ta yuda e comunidad di Aruba na diferente manera: ta traha pakete di cuminda y pakete di sosten, ta duna pan tres biaha pa siman, ta duna paña y articulonan di cas pa clientenan cu ta registra cu e fundacion y ta ofrece guia personal di trahadonan social. E clientenan mes tambe ta haya oportunidad di participa den e trabou boluntario na FPNC, di e manera ey ta crea estimulo personal y combati isolacion.
Director di Banco di Caribe, Sr. Giovanni Croes a haci entrega di e comestibelnan cumpra cu contribucion di empleadonan y Banco di Caribe na FPNC y a gradici tur boluntario cu ta duna di nan tempo pa yuda e clientenan y esunnan mas vulnerabel den nos comunidad. Pa bira un boluntario por bishita www.fpnc.aw y aplica online of yama na 588 0002 pa mas informacion.
