Cu mas di 20 aña di trayectorio, Banda La Paranda (BLP) ta celebra lansamento di su produccion musical di mas recien, titula “Yam’e Ayo.” E proyecto aki, yena di energia y alegria, ta conta cu e direccion y produccion maestro di Denny Frans, kende tabata un piesa clave den e exito continuo di e agrupacion.
E reconocido maestro Frans, cu su maestria destaca, a guia e grupo a traves di un proceso creativo cu ta resalta e esencia y e pasion di Banda La Paranda. Su incansabel dedicacion y talento tabata fundamental pa mantene e magia di e musica bibo cu ta caracterisa e grupo.
Di su parti, maestor Ivan Croes a aporta su excelencia como areglista, hincando bida den e composicionnan di e banda y destacando e talento di su integrantenan. E cantantenan Gregory Vásquez, Roland Jansen y Wilbert Maduro (Wiwi), hunto cu e musiconan Rignald Alberto y Giovanny Fan Ras, entre otro, a contribui cu pasion y arte n’e capitulo nobo aki den e historia di Banda La Paranda.
Un elemento destaca di e produccion nobo aki ta e bosnan femenino cu ta enrikece e repertorio. Janina Nina Henriquez, Sharline Hernandis, Nicole Martines de Kort y Djanira Rasmijn, como cuartero vocal, a demostra nan talento y compromiso, añadiendo un dimension special na *Yam’e Ayo*.
Banda La Paranda ta gradici profundamente tur esunnan envolvi pa nan amor, pasion y entrega, elemento cu a haci e lansamento aki posibel. “Yam’e Ayo” ta priminti ta un celebracion musical cu lo resona den curason di su siguidonan. Danki pa comparti boso arte y mantene bibo e vlam di musica Arubiano y en particular durante e dianan di fiesta.
