Esun cu ta stima, nunca no kier domina, tampoco manipula, e no kier e posicion di otro, e no kier manda, e ta humilde y simpel , y ta stima Dios na prome lugar.
Si un un hende no ta stima Dios, e no por stima hende, pasobra Dios ta amor, tin hopi cos cu hende ta yama amor, caba ta comedia temporal, interes den cos, interes carnal, interes djis pa haci manera mi curason tey , y mi sa masha bon cu mi curason no tey.
Caminda bo curason ta eynan bo amor ta, no haci wega cu curason di hende, pasobra bo ta haci bo mes dolor, aunke ta parce manera bo ta gana, na final bo ta sali perdi, pasobra ningun hende por sconde pa Dios, y Dios mes lo saca tur cos na cla, ken ta e comediante, manipulador, y ken ta stima di berdad, pasobra e conoce e e amor di berdad.
Un hende no tin mester di placa pa e stima , pasobra si ta pa motibo di placa bo ta stima, anto bo amor no ta berdadero, e no ta real. Amor ta cuminsa cu respet, amor ta cuminsa cu aprecio, amor no ta busca cos pa rabia , y despues drecha, esun cu ta stima no ta manipula, pasobra tin hopi hende ta manipula cu nan amor, y lubida cu amor no ta di nan pero amor ta bini di Dios.
Amor no tin dos cara, amor no tin curason dobbel, pasobra un hende di curason dobbel, no tin fe, y Dios no por huse, e ta inconstante, asina ta tambe den nos bida di tur dia, un hende inconstante, no tin palabra, e no ta para un caminda, bo no por depende di dje, pasobra e amor di Dios , no ta den dje, e ta stima cosnan di mundo, y ta pesey e no por pone su amor den e lugar corecto.
Amor no ta domina ni tampoco maltrata, pasobra Dios no a duna hende dominio riba otro( Genesis 1:26-28), amor ta entrega su curason sin condicion, y ta stima caminda su curason ta wordo acepta.
Den bista di Dios tur hende ta bunita, pasobra tur hende a wordo crea den imagen y semehansa di Dios.
Hopi ta pensa cu bunitesa ta amor, hopi ta kere cu un bon curpa, un curpa sexy ta amor, hopi ta kere den un persona tipo artista ta amor, esey no ta amor, si un hende no ta respeta bo, y no sa di pidi despensa,y pordona, pero ta keda para riba su orguyo, e persona ey te ainda tin cu conoce e berdadero amor.
Tene bon cuenta cu adulterio no ta amor, adulterio keto bay ta pica den bista di Dios, y e tin su concesuencia pa tur esnan cu participa den dje, adulterio ta bobedad, falsedad, tanto na cielo como na tera,no ta solamente e ta causa herida den pareha, pero tambe den famia.
Cada matrimonio kibra ta debilidad pa nos sociedad, e bida social ta wordo interumpi, pesey den 1 Corintionan 13 Dios ta papia di amor berdadero.Y den 1 Corintionan 7 Dios ta papia di matrimonio, cual ta e institucion mas fuerte y bunita cu Dios a crea, pesey e ta wordo tanto odia door di diabel y su compinchi, pesey tanto hende kier imita, pero nan sa masha bon cu berdadero amor no por wordo imita.
Trata hende netji, Amor no ta regalo so , e ta respeta y stima,, amor no ta relacion sexual solamente, amor no ta un novela, amor ta bida.
Sinceramente, Pastor Marcel Balootje
