SOLO DI PUEBLO a ricibi e informe cu un concocido barco cu ta frequenta Aruba regularmente, Arcangel Miguel, a bolter den awa di Colombia y sink diasabra anochi den careda di 9’or.
Pa 9.or di anochi di diasabra 21 di Mei 2022, e barco di bandera Venezolano a bolter y sink den awa internacional.
Arcángel Miguel a sali for di Aruba, segun su ultimo signal cu a keda registra for di su transponder. E ta un barco color blauw, numera AMT-004, y haye den situacion di olanan bruto y inespera cu a bolter e barco dilanti Puerto Estrella, na La Guajira, Colombia.
Den e barco tabatin 7 pa 8 persona, di cual solamente uno a sobrevivi, Juan Carlos Sanches.
E 7 nan ta: Ledy Rafael Mata- copiloto; Lino Alberto Gómez Galicia, prome oficial; José Antonio Salazar Malvar, jefe; Juan Carlos Sánchez Sánchez, bosun; José Alberto Sánchez Núñez, Andry José Narváez Sánchez, y José Manuel Vizcaino Frontrado.
Un ola a bolter e barco y Sanches a logra sali di cushina, unda e tabata encontra su mes, mientras cu e otro compañeronan a wordo sorprendi. Nan tabata drumi y no tabata tin chens pa sali.
Juan Carlos a logra subi un boto di emergencia y rema bay tera te ora el’a wordo yuda pa algun piscador.
Segun registro online, diabierna 20 di Mei e barco aki tabata na Aruba. Di nos fuentenan, nan a confirma di a mire ta cargando mercancia.
