Ombudsman mr. sra. Jurima Bryson, actuando tambe den su capacidad di Ombudsman di Mucha, a publica e rapport “E Prijs di ta Malo” dia 13 di juli 2026. E rapport aki ta resultado di un investigacion riba propio iniciativa di Ombudsman tocante e maneho di ausencia pa motibo di malesa den enseñansa na Aruba. E investigacion a concentra riba e obligacion pa un alumno presenta un declaracion medico (cu e mes mester paga p’e) ora e no por presenta na scol pa motibo di malesa en particular na momento cu e mester haci un toets of examen.
Pakico a haci e investigacion aki?
Motibo pa haci e investigacion tabata diferente señal cu Ombudsman a ricibi di mayornan, alumnonan, docente y otro persona involvi, indicando cu na momento cu un alumno ta malo e mester presenta un declaracion medico pa por haal in un toets of examen. Ademas, Ombudsman a ricibi señal cu na momento cu e alumno no presenta e declaracion medico esaki por tin consecuencia pa e posicion di enseñansa di alumnonan.
Den e rol di Ombudsman di Mucha a pone atencion special na interes di mucha, e derecho riba educacion, trato igual y proteccion di privacidad den e investigacion aki.
Kico e investigacion a indica?
E investigacion a indica cu scolnan ta aplica e reglanan pa preveni ausencia no autorisa, controla notificacion di ausencia door di malesa y promove trato igual entre alumnonan.
Na mes momento, Ombudsman ta constata cu tin barera financiero y practico pa algun alumno y famia pa por obtene un declaracion medico.
Ademas, e investigacion a indica cu e reglanan no ta wordo aplica na mesun manera na tur scol. Como resultado, no ta tur ora tin claridad tocante e reglanan vigente, e posibilidadnan pa adapta na cada circunstancia individual di e alumno y e consecuencia di no por presenta un declaracion medico.
Pakico esaki ta importante?
Reglanan di maneho tocante ausencia pa motibo di malesa formula na un manera cla y considerando tur partido ta importante pa preveni abuso y garantisa continuidad di enseñansa. Na mes tempo, mester evita cu alumnonan cu ta realmente malo wordo perhudica desproporcionalmente .
Ombudsman ta enfatisa cu ora ta trata di medida cu ta afecta muchanan, semper mester tene cuenta cu interes y derechonan di mucha, acceso na educacion, oportunidad igual, accion proporcional y proteccion di privacidad.
Kico Ombudsman ta recomenda?
Ombudsman a bin cu varios recomendacion pa Minister di Enseñansa, instancianan di enseñansa concerni y otro partidonan responsabel. Entre otro, ta recomenda pa bin cu reglanan di maneho mas cla y mas uniforme tocante ausencia pa motibo di malesa, pa informa alumnonan y mayornan miho tocante e reglanan vigente, pa crea espacio pa alternativa y posibilidadnan pa adapta na cada circunstancia individual, pa limita bareranan financiero y pa mehora proteccion di datonan medico.
Cu e rapport aki, Ombudsman kier contribui na un mihor balansa entre preveni ausencia no autorisa y proteha alumnonan cu ta realmente malo.
Proximo paso
Ombudsman lo sigui e desaroyonan di e instancianan di enseñansa den nan ehecucion di e recomendacionnan aki. Tambe Ombudsman lo keda den dialogo cu Minister di Enseñansa, e instancianan concerni y e supervisornan.
E rapport completo “E Prijs di ta Malo” ta disponibel riba website di Ombudsman, www.ombudsman.aw/pa/publicacion/.
Keda na altura di tur desaroyo
Bureau Ombudsman ta mantene comunidad informa via e siguiente canalnan di comunicacion:
- Facebook: Ombudsman Aruba
- Instagram: ombudsmanaruba
- LinkedIn: Ombudsman Aruba
