Durante e Common Good Conference, Bario Mabon a firma oficialmente un Memorandum of Understanding (MOU) cu Gobierno di Aruba, marcando un paso importante den colaboracion entre gobierno y bario pa promove e bon comun.
Segun Astrid Vries, presidente di e comison di bario Mabon, e acuerdo ta representa un cambio significativo compara cu pasado. El a indica cu durante añanan anterior, bos di bario no tabata scucha, pero cu e situacion a cambia den e periodo actual.
“Den pasado nos no tabata tin oido di gobierno, pero awe nos ta sinti cu e gobierno aki si ta scucha nos,” segun Vries.
E firma di e MOU, haci cu orguyo y cu un fuerte sentido di compromiso pa traha hunto pa bienestar di comunidad. Segun e presidente di e comison, e colaboracion no ta enfoca solamente riba un grupo specifico, pero riba henter comunidad: mucha, hoben, adulto y adulto mayor.
“Nos kier traha hunto pa trece bienestar y cambio pa nos muchanan, nos hubentud y nos grandinan,” Vries a enfatisa.
El a destaca cu mayoria cambio den e bario no ta algo cu por logra di un dia pa otro, pero cu e MOU ta crea un base pa progreso duradero den añanan cu ta bin. Segun Astrid, e compromiso mutuo entre gobierno y comunidad ta esencial pa logra cambio real y sostenible.
E testimonio di Bario Mabon a reenforsa e mensahe central di e Common Good Conference: cu e bon comun ta construi den colaboracion, dialogo y accion conhunto. Pa Vries, e acuerdo ta un invitacion pa sigui traha hunto pa un comunidad mas fuerte y cu mas oportunidad pa tur.
“Pa logra e bon comun, nos tin cu traha hunto,” Vries a conclui.
