Conforme e tarea di e Comite di Maneho Monetario (CMM) pa evalua, dicidi y duna transparencia riba e accionnan di maneho monetario di Banco Central di Aruba (BCA), BCA ta desea di comunica lo siguiente. Durante e reunion di 17 di augustus 2022, CMM a dicidi pa mantene e reserva obligatorio na 24,0 porciento entrante 1 di september 2022. Di e manera aki, e banconan comercial mester tene un balansa minimal na BCA cu ta igual na 24,0 porciento di e depositonan riba termino cortico di nan clientenan. E decision pa mantene e reserva obligatorio na 24 porciento ta basa primordialmente riba e bahada continuo den e nivel di likides excesivo na e banconan comercial, ademas di un nivel adecua di reservanan oficial y internacional.
E CMM a considera e siguiente informacion y analisis den su deliberacion:
Reservanan internacional y oficial
E reservanan internacional, cu ta consisti di reservanan oficial di BCA y reservanan di divisa na e banconan comercial a subi cu Afl. 345,2 miyon (Grafico 1) riba 29 di juli 2022, compara cu fin di december 2021. E reservanan oficial a aumenta cu Afl. 264,0 miyon durante e mesun periodo, mientras cu e reservanan teni pa banconan comercial a subi cu Afl. 81,2 miyon. Consecuentemente, riba 29 di juli 2022, e reservanan oficial y internacional a suma Afl. 3.008,9 miyon y Afl. 3.474,8 miyon, respectivamente. Pa e resto di 2022, BCA ta premira mas expansion den e reservanan internacional y oficial debi na extra entrada di divisa relata na turismo y un subida den inversion procedente di exterior. Mantencion di un nivel adecua di reservanan ta critico pa mantene e tasa di cambio fiho entre e florin Arubano y e dollar Mericano. Relata na esaki, BCA ta anticipa cu reservanan internacional lo permanece riba e tres luna di pago riba e cuenta coriente di e balansa di pago. E pagonan riba e cuenta coriente di balansa di pago ta consisti di pagonan pa importacion, pago di interes na inversionistanan stranhero y transferencianan pa exterior manera placa manda afo door di trahadornan stranhero. Ta proyecta cu e reservanan oficial lo permanece dentro di e margen aceptabel basa riba e metrico ‘Assesing Reserve Adequacy’ (ARA) di e Fondo Monetario Internacional (FMI) (Tabel 1).
Grafico 1 – Desaroyo den reservanan oficial y internacional.
| Tabel 1: Metriconan relata na reservanan observa den 2022 | |||||
| jan | Feb | Mrt | apr | mei jun | |
| Cobertura di pagonan riba cuenta coriente¹ | 8,8 | 8,7 | 9,4 | 9,2 | 9,1 8,6 |
| Metrico di FMI ARA2 | 110,6 | 110,0 | 123,4 | 128,7 | 129,3 128,6 |
| ¹ E cantidad di luna di pagonan riba cuenta coriente cu e reservanan internacional ta cubri.² E proporcion entre e nivel di reservanan oficial y e nivel mínimo adecua (conforme FMI), den porcientonan. |
Inflacion
Na juni 2022, e Indice di Prijs di Consumo (IPC) tabata 5,3 porciento mas halto compara cu e mesun luna di e aña anterior (Grafico 2). E aumento aki den e IPC compara cu e mesun luna di e aña anterior tabata causa primordialmente door di e aumento den prijs di gasoline, cu a afecta e componente di ‘transporte’ (contribuyendo cu 2,9 punto di porcentahe). Subidanan den e otro componentenan, esta ‘cuminda y bebida n0 alcoholico’ (contribuyendo cu 1,2 punto di porcentahe), ‘operacion di vivienda’ (contribuyendo cu 0,5 punto di porcentahe), ‘otro bienes y servicio’ (contribuyendo cu 0,4 punto di porcentahe), y ‘restaurant y hotel’ (contribuyendo cu 0,3 punto di porcentahe) tambe a contrubui na aceleracion di inflacion. E inflacion midi riba promedio di 12 luna a crece te na 3,4 porciento. BCA ta proyecta cu inflacion ta sigui aumenta durante e resto di 2022. E expectativa aki ta basa riba e subida den prijs di petroleo den mercadonan internacional, y avancenan den prijs di utilidad entrante augustus 2022. Ademas, Aruba lo importa un gran parti di e subidanan den prijs for di su partnernan di exportacion, particularmente for di Estados Unidos y Europa.
Mientrastanto, na juni 2022, inflacion basico (excluyendo cuminda y energia) a yega 2,0 porciento si midi e final di respectivo luna contra e mes un luna di e aña anterior. Inflacion basico midi na final di e respectivo luna contra e mesun luna di e aña anterior a wordo primordialmente causa pa e componente di ‘transporte’ (contribuyendo cu 0,7 punto di porcentahe), resultando for di aumento den prijsnan di auto (contribuyendo cu 0,6 punto di porcentahe). E componentenan ‘operacion di vivienda’ (contribuyendo cu 0,5 punto di porcentahe), ‘otro bienes’ (0,4 punto di porcentahe), y ‘restaurant y hotel’ (contribuyendo cu 0,3 punto di porcentahe), tambe a contrubui na e inflacion basico midi contra e mes un luna di e aña anterior. Basa riba un promedio anual, inflacion basico a yega na 1,5 prociento.
Grafico 2: Desaroyo inflacionario
Likides excesivo na banconan comercial
E total di likides excesivo na e banconan comercial a baha di Afl. 1.307,7 miyon na december 2021 te na Afl. 905,7 miyon na juni 2022 (Grafico 3). E caida significante aki den likides excesivo ta debi principalmente na e subidanan consecutivo den e tasa di reserva obligatorio durante e prome seis lunanan di 2022. No obstante, e nivel di likides excesivo a keda significantemente mas halto cu e nivelnan midi prome cu e pandemia (+ Afl. 266,3 miyon). Esaki tabata a causa di e nivel eleva di fondonan di likides (cu ta inclui cash, bononan di gobierno y otro activo likido) na banconan comercial, empuha tambe door di e nivel abou di demanda pa credito. Sinembargo, financiamento local di proyectonan relata na turismo y di negoshinan probablemente lo crece den e di dos mita di 2022, resultando den un bahada di e nivel di likides excesivo na e banconan comercial.
Grafico 3: Desaroyo den likides excesivo
