Pa por compronde miho con consumidornan na Aruba ta uza y percibi placa efectivo denomina na florin Arubano, Banco Central di Aruba (BCA) lo tene un encuesta digital tocante e confiansa den placa efectivo durante e periodo di 19 di October 2024 te cu 9 di November 2024.
E meta di e encuesta aki ta pa midi con hopi consumidornan ta uza placa efectivo (placa di papel y monedanan di florin Arubano), nan conocemento di e diferente denominacionnan di nos placa di papel y monedanan di florin y e nivel di confiansa den e autenticidad y e calidad di nos placa di papel di florin.
E data obteni lo asisti CBA na amplia su conocemento di e actividadnan economico y preferencianan di consumidor, mantene e confiansa den e florin, formula recomendacionnan pa e maneho relevante y subraya deficiencia den alfabetismo financiero.
BCA ta sigura cu e encuesta ta estrictamente anonimo y tur informacion obteni lo wordo trata confidencialmente y uza solamente pa metanan estadistico y pa maneho.
BCA ta encurasha tur residente di Aruba, cu tin 18 aña of mas, pa completa e encuesta aki. Pa participa, bishita e website di BCA www.cbaruba.org, pagina di Instagram ‘Centrale Bank van Aruba’ y pagina di Facebook ‘Aruba su Florin’ y completa e encuesta prome cu e deadline di 9 di November 2024. Si tin cualkier pregunta adicional, por fabor tuma contacto cu e Departamento di Sistemanan di Pago di BCA via email payment.systems.department@cbaruba.org.
