Huez Comisario a dicidi awe cu Benny por sali liber, pero bao di condicion. Esaki ta despues cu su abogado defensor a cuminza un caso pa asina saca su cliente for di prison.
Tabata dia 26 di Mei ultimo cu Benny a wordo busca na un cafetaria na Oranjestad, unda el’a cuminza e proceso di wordo interoga. Despues di cumpli 69 dia den prison, awe tardi 4.or e mag sali bek den libertad.
Sinembargo e libertad aki no ta uno total, pero condicional. Benny lo no mag tin contacto cu ningun otro sospechoso. Tin mas condicionnan imponi, manera cu e lo promete di haci acto di precencia na prome yamada di fiscal, landsrecherche of huez.
Benny Sevinger ta sospechoso den e caso di Avestruz, cu cinco pa seis cargo masha pisa di corupcion, unda entre otro e lo ta forma parti di un grupo criminal, a cumpra empleado pubiico, a ricibi algo a cambio di duna tereno, etc. etc.
Desde inicio su abogado David Kock tabata masha sorprendi di e tantisimo pruebanan cu tin den su contra, y David Kock mes a bisa cu su detencion lo ta bay pa largo.
Hunto cu Benny, tambe tabatin mas persoanan deteni, manera entre otro Leoncita Arends, Sussebeek, su secretaria, su empleadonan di oficina manera Every y Abath, como tambe amigonan manera Nina cu Gabi Werleman, y asina hopi otronan cu a wordo yama pa duna declaracion, pero no a keda deteni.
Fiscal nunca a gaña Benny den ningun carta:
Manera fiscal a skribi den e carta pa Benny, cu te cu September 2021 e lo tin un desicion formal, sea ta seponeer e caso of ta acusa Benny pa hibe dilanti mesa berde. Nunca e fiscal a menciona cu e investigacion lo wordo para te cu September 2021. Obviamente tanto Benny como su aliadonan, parece no ta compronde Hulandes dje bon ey.
Entodo caso, awor Benny ta sali bek den libertad y mas cu claro, awor lo sigui e proceso pe huramenta como parlamemtario di pais Aruba.
E por keda parlemntario pa 4 aña, pero lo perde su derecho di ta parlamentario si e ricibi un sentencia di huez, unda e ta culpabel na corupcion.
SOLO ta premira cu e caso aki lo bay pa largo tempo ainda, unda cu kisas te na November lo por bin un desicion y si hiba Benny corte, esaki lo por ta na 2022.
