Tur luna Horacio Oduber Hospital (HOH) su enfoke ta pa elogia coleganan cu di un forma of otro ta destaca y e ultimo luna di 2022 a toca turno na dokter Bert Rodenburg, internista, cu a ricibi reconocemento special pa su aporte den cuido na HOH. Despues di a pospone e fecha varios biaha a logra sorpres’e cu e grato anuncio aki. Den presencia di diferente colega y Hunta di Directiva a pasa un rato ameno unda a otorga su certificado y a hiba algun palabra tocante motivacion tras di su nombramento pa sali empleado di luna di december 2022.
Bert ta un dokter cu experticio amplio riba su tereno y ta tuma su tempo pa splica pashent, e famia pero tambe e personal di cuido. E ta un persona habri, amabel y semper ta honesto, pues no tin miedo di duna su opinion. Un dokter diligente cu ta haci su trabou cu respet, ta integro y tin amor pa su trabou. E ta percura pa su conocemento keda up-to-date y ta dispuesto pa comparti esaki tambe. Pashentnan ta aprecia Bert hopi. E ta un dokter amabel cu tin curason pa su pashent y ta demostra esaki den su dedicacion na su trabou.
Como internista y infecciologo, Bert tabata e motor tras di e lucha contra e pandemia di Corona. Hunto cu coleganan ela traha riba protocolnan y regla y alabes Bert tabata un sosten grandi pe personal di cuido cu a sinti nan safe aunke yena di incertidumbre, miedo tur y insiguridadnan rond di nan. Tambe e tabata duna informacion na henter comunidad durante conferencianan di prensa di Gobierno di Aruba.
Bert ta un persona hopi rustig cu por wordo acerca facilmente tanto pa pashent, nan famia y coleganan. A pesar di e categoria di pashent delicado e ta keda semper profesional, atento y servicial. Ademas, semper e ta keda positivo y ta dispuesto pa yuda cualkier caminda den y pafo di HOH. En corto, un colega ehemplar cu sigur merece e reconocemento aki!
Masha pabien Bert!
