Diabierna merdia Hues di Corte den Promer Instancia a dicta sentencia den e caso penal cu Ministerio Publico a cuminsa contra Wilfred Besaril (51) y Glen Ling (62). Ta asina cu Besaril no a presenta pero su abogado mr. Doris Canwood si. Lin a presenta cu su abogado mr. Illes.
SOLO DI PUEBLO por a compronde cu Hues a condena Besaril na castigo di prison combina y cu Besaril mester paga bek na Gobierno mas di 138 mil florin. Lin mester haci trabao pa comunidad.
Luna pasa, 23 Mei 2025, Fiscal a exigi pa Besaril 2 aña di prison y 1 aña di prison pa Lin di cual 6 luna ta condicional cu 3 aña di tempo di prueba. Tambe Fiscal a exigi pa Besaril mester paga bek 199.482 florin na Gobierno di malversacion y si no paga e lo mester bay 3 aña sera den prison.
SENTENCIA
Hues a bisa cu e ta haya legalmente proba cu Besaril y Lin ta complice di malversacion di placanan di Aruba Huis. Tambe Hues a bisa cu Besaril a haci mal uso di su funcion como Minister Plenipotenciario y Lin a haci mal uso di su funcion como director di Aruba Huis.
** Hues ta haya cu e asunto di telefoon priva pa Besaril ta gastonan sin cu tabatin motibo valido. Hues a sigui bisa cu e ta haya cu Lin a aproba e gastonan aki cu ta 14 mil florin.
** Hues a sigui cu e asunto di huur di cas pa Besaril na Hulanda. El a menciona e gastonan di drechamento, muebles, jardin y sistema di alarma. Hues ta haya cu door cu ta trata di cas pa Minister Plenipotenciario, no ta tur ta asunto priva. Hues ta di opinion cu Gobierno mester paga un parti di e gastonan. Sinembargo tin gastonan manera e jardin, sistema di alarma y otro drechamento, cu Hues ta haya cu no tabatin motibo valido. Hues a bisa cu Besaril a malversa 72 mil florin.
** Hues a mustra cu e compania cu Besaril a contrata na Hulanda pa haci trabaonan publicitario pa Aruba Huis, esaki ta gasta placa innecesario pasobra Gobierno di Aruba tin su hendenan pa haci e trabao ey.
** E asunto di estadia na Aruba, caminda Besaril a haci gastonan riba carchi di credito di Aruba Huis pa asuntonan priva, Hues ta haya cu e gastonan di VIP no ta malversacion.
** Pa loke ta e asunto di usa e carchi di credito di Aruba Huis den hotelnan y otro lugarnan, Hues ta haya cu Besaril a usa e carchi di credito di Aruba Huis pa asuntonan priva y Lin a aproba esakinan. Esaki ta 47 mil florin.
BESARIL A MALVERSA PLACA PA SU MES
Pa cu e castigo, Hues a mustra cu e ta haya cu Besaril a malversa placanan di Aruba Huis pa cosnan cu ta pa su mes. Hues ta haya cu Besaril a causa daño na Aruba Huis. Durante un periodo largo, Besaril a haci esaki.
Na opinion di Hues, pa Besaril e tabata un costumber di haci esaki y no ta realisa cu el a haci malo. Besaril ta mustra riba otronan. Hues a bisa cu e condena di Besaril lo ta menos di loke Fiscal a exigi. Hues a splica cu el a tene cuenta cu Besaril a wordo kita di su funcion. Tambe cu e lo wordo ordena pa paga e gastonan cu el a haci. Hues a bisa cu e lo impone un castigo combina pa asina evita cu Besaril lo por bolbe haci algo asina den futuro.
LIN A FAYA NA ARUBA HUIS
Na opinion di Hues, Lin como director di Aruba Huis a laga di desea. Hues ta haya cu Lin no tabata hiba control debido y no a cuestiona e gastonan di Besaril cu no tabata bon. Hues a mustra cu den Corte, Lin mes a bisa cu e tabata tey por nada na Aruba Huis pasobra Besaril tabata dicidi.
Hues a tene na cuenta cu Lin mes no a haya beneficio di e malversacion. Tambe Hues a tene cuenta cu Lin a coopera cu investigacion y ta reconoce cu el a faya como director. Hues ta haya cu mester manda un señal cu no ta tolera esaki. El a bisa cu e lo impone castigo combina pa Lin.
CASTIGO
Hues a condena Besaril na 20 luna di prison di cual 10 luna ta condicional cu un tempo di prueba di 3 aña. Esey ta nifica cu Besaril mester bay bek KIA pa caba di sinta mas o menos 9 luna, teniendo cuenta e tempo cu e tabata sera.
Den caso di malversacion di placanan, Hues a calcula e suma total cu Besaril mester paga bek ta 138.688 florin. Hues a bisa cu si Besaril no paga, e lo mester bay 1 aña sera den KIA.
Hues a condena Lin na 180 dia di prison di cual 171 dia ta condicional cu 3 aña di prueba. Esey ta nifica cu Lin no mester bolbe bay sera den KIA. Hues a sigui bisa cu banda di e castigo di prison e ta condena Lin na 200 ora di trabao pa comunidad y si Lin no cumpli cu esaki, e lo mester bay 100 dia sera den KIA.
