Enseñanza di bon calidad. Esaki ta lo cual nos tur kier pa nos yiunan. Esaki ta loke e directiva actual di Stichting Voortgezet Onderwijs Aruba (SVOA), antes conoci bou di e nomber SMOA (Stichting Middelbaar Onderwijs Aruba) ta boga pe. Manera ta
conosi, Colegio Arubano a wordo institui día 20 di maart 1959 dor di Obispado di Willemstad. Pues Colegio Arubano su principio ta catolico, pero su portanan semper tabata y ta habri pa tur alumno di otro credo. E directiva actual a wordo institui na augustus 2020. Según ley directiva ta e “bevoegd gezag” y e ultimo responsabel pa e maneho na scol.
Ultimo dianan por a tende y lesa den medionan di comunicacion y riba media social, di e turbulencia cu Colegio Arubano ta den. Tambe a cubri directiva y personal di SVOA bou di un avalancha di negativismo y a lastra e integridad di su miembronan.
E turbulencia aki no ta algo di awe ni di e ultimo aña escolar pero tin su raíz den pasado.
Pero, a pesar di tur diferencia di opinion, e diferente cambionan den rectorado, directiva y estatutonan, e meta comun mester keda: garantisa e derecho di e alumno riba enseñansa di calidad y nan bienestar na scol. Esaki simplemente pasobra ta nos alumnonan ta e ‘cuore’, e nucleo di un scol.
Esaki ta netamente loke e directiva actual di SVOA ta para pe. E punto di salida di directiva di SVOA ta cu ta kere den profesionalismo, desaroyo y dialogo continuo basa riba principio di ‘good governance’. Y directiva ta kere cu rectorado, docentenan, personal y mayornan tambe ta para tras di e principio aki.
Docentenan y rectorado a manda un carta, fecha 18 di januari 2022, den cual carta ta exigi retiro di directiva a base di ‘kiebro di confianza’ (vertrouwensbreuk). Aki ta bon pa realisa ku nombramento di un miembro di direktiva di SVOA ta tuma lugar
conforme un mecanismo ku e estatutonan di e fundacion ta determina.
Den e carta di 18 di januari 2022, e docentenan ta menciona tres punto pa hustifica e kiebro di confianza. Aki directiva kier trece dilanti cu for di 10 di januari 2022 a invita e docentenan, pa medio di nan representante, tres biaha pa sinta na mesa pa
dialoga. No a duna oído na e invitacionnan. Dia 26 di januari 2022 directiva a invita nan directamente pa un dialogo riba e contenido di e carta cu por cierto a wordo publica den medionan di comunicacion. Den e carta aki tin diferente punto cu mester keda atendi y contra aresta pa motibo cu nan no ta cuadra cu berdad. Ta bai asina leu cu ta lansa sospecho di mal maneho financiero sin ningun prueba.
Dia 18 di januari 2022 a tuma un medida (“ordemaatregel”) contra un funcionario. Esaki ta un prerogativo di directiva pa por crea un espacio pa por hasi un investigacion necesario. E docentenan, cu no tabata tin ningun conflicto laboral cu SVOA y/o su directiva, a dicidi di welga, ku apoyo di nan sindicato, sabiendo ku e siman ey tabata un siman di CP y SE.
Dia 21 di januari 2022 a papia ku e funcionario, cu a bin acompaña pa su abogado.
Di parti di directiva a splica cu e investigacion a mustra ku aunke tin algun keho riba su funcionamento ku ta rekeri e atencion necesario, e kehonan aki no ta duna motibo pa tuma medidanan disciplinario. Esaki pasobra directiva ta di opinion ku e ta kapas di mehora su funcionamento, motivo pakiko directiva ta lag’e sigui traha basta tin mehora riba cinco punto ku a keda menciona den e carta. Por ultimo. Den e directiva actual tin tres miembro ku a atende Colegio Arubano.
Nan, mescos cu e otro dos miembronan, tin experticio riba diferente tereno di profesionalismo, entre cual enseñanza.
E les di mas importante di e ultimo dianan ta, cu no por soluciona a corto plazo problemanan ku ta resultado di erornan di añanan largo.
Pero si por cuminsa un dialogo structural pa huntu purba yega na solucionnan duradero.
