Discurso di Minister Xiomara Maduro durante e Manisfestacion Cultural virtual en conexion cu Celebracion di Dia di Betico:
Oranjestad – Durante e Manifestacion Cultural virtual en conexion cu Celebracion Dia di Betico, Minister Xiomara Maduro a tene un bunita discurso, durante cual ela lo recorda Nos Libertador Gilberto François (Betico) Croes. E aña aki pa motibonan ya conoci Dia di Betico ta wordo celebra den un forma diferente.
Un lucha cu a marca historia
E dignatario a recorda cu dia 25 di januari Nos Libertador den feliz memoria lo a cumpli 83 aña y dia 1 di januari Pais Aruba a cumpli 35 aña cu Status Aparte denter di Reino Hulandes. Un lucha cu a marca historia cu Betico a hiba y a logra cu awe Aruba ta un Pais autonomo den Reino Hulandes. Betico como un politico sincero y honesto a gana e confiansa di nos pueblo cu tabata mire como un gran lider cu un conocimento amplio di e constelacion politico. Ela sa di cosecha admiracion local y den exterior. Un lider cu a sirbi nos Pais cu optimismo y semper a pone e interes pa Aruba na prome luga. Betico su legado ta keda caracterisa pa su Determinacion, Perserverancia y Union.
Determinacion
E mandatario a enfatisa cu Nos Libertador tabata sa kico su pueblo tabata kier: un Aruba cu ta doño di su propio destino. Cu determinacion ela tuma e responsabilidad grandi cu su pueblo di Aruba a dune y ela defende interes di Aruba na tur momento. Cu determinacion, fe y e forsa di Arubiano ela enfrenta Hulanda y a logra e soberania di su pueblo. E lucha no tabata facil pero cu determinacion ela sa di hiba e lucha pa Aruba su Status Aparte.
Perserverancia
Betico a experiencia hopi contratiempo durante di e lucha pa Status Aparte, pero e no a entrega ora ela haya resistencia, ela bira mas fuerte y a perservera. Hunto cu e apoyo di e pueblo di Aruba a dune, ela perservera y continua cu su lucha. Ora hopi hende tanto local, na Hulanda y Antia a kere cu e lo a laga e lucha na caminda, pero ela sa di perservera.
Union
Minister Maduro ta subraya cu Betico ta bay den historia como un lider cu a sa di uni su pueblo den e lucha cu a marca historia. Ela bisa semper cu un pueblo uni hamas por ser venci. Durante di e dianan mas scur durante e lucha, Aruba a uni y a bira mas fuerte. ‘E Tata di Aruba’ a uni Aruba manera UN famia. UN Aruba.
Legado di balor
E mandatario ta bisa cu Betico a laga un legado cu e balornan di Determinacion, Perserverancia y Union pa nos y nos futuro generacion. Minister Xiomara Maduro a gradici Betico pa laga nos e herencianan aki y a bisa cu nos lo sigui bo ehempel pa enfrenta tur reto y logra cosnan grandi pa nos Pais. E dignatario a subraya: ‘Betico, bo no ta hunto cu nos mas, pero sa cu nos ta carga bo keto bay den nos mente y curason.’
Gradicimento
Minister Xiomara Maduro a gradici e Comision Celebracion di Dianan Nacional y tur e talentonan local cu a presenta un bunita show cu canto, poesia, musica y baile. E mandatario a termina su discurso yamando pueblo di Aruba na nomber di Gobierno Masha pabien y a desea un y tur un ‘Feliz Dia di Betico’.
