Editorial Solo di Pueblo:
No solamente el’a libera Aruba….
Poco por a pensa, cu e lucha tenaz hiba pa Betico, por a traspasa tur barera, unda no solamente a cambia destino di Aruba, pero di tur otro isla den Antiyas di 6.
E lucha di Betico a wordo realisa den un lapso di 15 aña, desde fundacion di MEP, te cu 1985 ora e lucha a wordo realisa.
E momentonan di alegria, desde 1983, cu “de kogel is door de kerk”, poco por a pensa, cu lo tin su consequencia pa henter Antiyas.
Hopi otro politiconan kisas a duda den Betico su habilidad y vision. Ora cu Hulanda a canta un “no” rotundo, cu Betico su peticion ta imposibel, no a keda Betico otro opcion pa escala su lucha, hibe di Status Aparte, pa Independencia. Un cos tabata cla: Aruba tin cu sali for di e dominio di Curacao y esey lo sosode “cuesta loque cuesta”.
E logro di Betico Croes, a laga su sicatris den Antiyas. Otro islanan a mira e perspectiva grandi cu Aruba a haya, unda por a habri hala y tuma su destino den mes un mas. Decisionnan desde 1986 ta wordo tuma na cas y no mas na Curacao.
A keda Antiyas 24 aña mas, despues cu Aruba a sali afo. Na 2010, ata nos a conoce fin di Antiyas unda cada isla a escoge nan rumbo y nan
laso nobo y directo cu Hulanda.
E perseverancia di Betico, e deseo profundo di mira un Aruba liber, e deseo di nos antepasadonan cu a inicia na 1930, unda algun cuidadano a manda un carta via polis, pidiendo Hulanda pa mas autonomia, sigui despues pa un accion di firma na 1940 pa 2147 Arubiano cu a entrega carta na La Reina.
Mas cu claro, Betico no a logra esaki sin uni e pueblo y e vehiculo politico MEP, tabata di significacion grandi y total.
Cu awe nos tin gobierno propio y parlamento propio, cu propio institutonan y cu lasonan directo cu Hulanda, ta danki ne generacion di 1980 y 1980 cu a lucha schouder cu schouder cu Betico.
