Si shonnan, asina mes! Mesa di redaccion a keda resona manera campana di misa despues di yama Aurora ora cu e noticia a drenta manera un bom cu e ekipo invicto di 2023, esta Team Snor, a bira victima di un berdadero masacre aya n’e palacio di pega piedra, e mundialmente famoso Domino Square Garden net n’e grens entre Calabas y Kudawecha!
Kico a bay fout? Con e desastre aki por a desaroya su mes? Hopi tempo caba tabatin “onrust” bou diferente ekipo pasobra niun di nan por a bati Team Snor y e sed pa vengansa tabata bira mas grandi dia pa dia, bataya perdi tras di bataya perdi! Cu aña lo a habri c’un “dikke lip” cerca integrantenan di Team Snor niun hende, ni e bookienan na Londen o Las Vegas, por a premira. Den un entrevista exclusivo, lider di Biba Lekker DT, Capitan Trimon man n’e timon, a declara cu ta di hopi tempo caba e tabata haya Snor y compinchinan tabata blof demasiado hopi! A bira tempo pa para e cos aki, aldus Capt. Trimon.
Y asina mes por a sinti diasabra ultimo 18 di januari cuminsando pa 8’or di anochi cu tin algo ta “hang in de lucht” … wowonan skerpi a observa cu Snor tabata drif manera naufrago den lama bruto ya cu e motor strategico di Team Snor, esta Captain Magda, tabata “afwezig” y tur decision importante a bira mescos decretonan di presidente Biden: totalmente sin balor! Den prome tanda, Biba Lekker DT a cuminsa style di “drill, baby, drill” y sin piedad a sacudi fundeshi bou pia di Snor. Cu score ominoso, Biba Lekker ta drenta halftime c’un bentaha di 11-6! Di dos tempo ta bay aden y Team Snor ta haci un atento sobrehumano pa “boltia” e “deficit” haci esaki un “surplus”, pero esaki tabata totalmente en vano. Cu score di 21-16 Biba Lekker DT ta habri aña mustrando Team Snor cu e leynan di Isaac Newton keto bay ta vigente: Tur cu bay laira, un dia tin cu bin abou bek. Shonnan, keda pendiente … het wordt spannend!
