E aña akí, Denise de Jongh-Rekwest a publiká un buki nobo, ‘Roxy, mi dushi bida’, kontá pa Roxy mes, su kachó di kas. ‘Roxy, Mi Dushi Bida’. E storia ta den linea cu e tema di e Festival di Buki pa Mucha di e aña aki ‘Na mi Kas’. Denise ke haci muchanan mas consciente di cuido y atencion pa bestia di cas manera Roxy su cacho. Denise ta na Aruba e siman aki pa bishita diferente scol y conta storia.
Denise de Jongh-Rekwest a nase na Kòrsou, tin laso familiar ku Aruba i ta biba pa basta aña na Boneiru. Denise tin un yu muhé, Kaylee, su inspirashon pa su seri di buki di Kaylee. Despues di studia i traha den turismo, el a lanta su propio negoshi di training & consultancy. E ta duna diferente training, entre otro di servisio, komunikashon, teambuilding i etiketa. E training di mas popular ta esun di etiketa. Na aña 2008, Denise a skirbi i publiká su promé buki di etikèt pa mucha esta Kaylee i su primunan ku fakansi na Kòrsou. Tin kuater buki den e seri di Kaylee i dos luisterboek na Papiamentu i Hulandes.
Na 2010 su buki di strep, ‘Gino y Gina, amigo di curason’ a sali komo buki di regalo na Aruba en konekshon ku Festival di Buki pa Mucha. Denise a skirbi i publiká te ku awor 18 buki di su mes. Tambe el a publiká 20 buki pa diferente otro outor i instansia di Aruba, Boneiru, Kòrsou i Hulanda via Request Publishing, su propio editorial. Denise sa partisipá na e diferente simannan di buki pa mucha na Aruba, Boneiru i Kòrsou.
Banda di skirbi buki pa mucha, Denise ta gusta lesa buki, fotografiá i pinta. Pa sa mas di Denise por bishitá su wèpsait www.requestpublishing.com i Facebook Denise de Jongh.
