No tin ningun criatura scondi for di Su bista,ma tur cos ta habri, y bisto dilanti di e wowo di Esun cu nos tin di haber cun’E.( Hebreonan 4:13).
Si un mayor ta bon na altura cu su yiu a haci malo, y no kier stop, pero ta sigi haci manera nada no a pasa, y e no ta coregi su yiu , e yui lo keda rebelde.
Aunke Herodes tabata un rey , Juan bautista a bise su berdad den su cara.( Lucas 3:19-20).
Si nos confesa cu nos boca cu Hesus Cristo ta Señor y kere den nos curason cu Dios a lant’e for di mortonan nos lo ta salba, pasobra cu curason hende ta kere pa haña husticia, y cu boca e ta confesa pa haña salbacion.( Romanonan 10:9-10).
Pesey ta masha peligroso ora hende neglisha locual ta para scirbi den Hebreonan 10:26: Pasobra si nos sigi peca boluntariamente despues di a ricibi e conocemento di e berdad, no ta keda sacrificio pa pica, sino un cierto espectativa,teribel di huicio y e furia di un candela cu lo caba cu e adversarionan.
Ora un hende comete pica, e hende mester arepenti personalmente y aparta for di pica, pasobra ningun di su amigonan, por drecha su cuenta dilanti di Dios, ta e mes hende mester confesa. ( 1 Juan 1:9)
Pa gracia nos ta salba pa medio di fe, pero esey no ta duna nos e libertad di sigi cana den libertinahe, y bolbe bek temporalmente for di caminda Dios a saca nos.
Pasobra Dios a libra nos y ranca nos saca for di den gara di diablo y a tuma nos den Su servicio como sirbido di Dios.
Pasobra nos tur prome cu nos conoce Dios tabata sirbi e malbado y tur locual mundo ta ofrece.
Pesey Dios den su misericordia ta adverti nos bisando: Ken cu pone e Ley di Moises un banda,ta muri sin misericordia riba testimonio di dos of tres testigo. Cuanto mas pisa ,bo ta kere cu castigo mester ta pa esun cu a trapa, e Yiu di Dios bao di su pia,y a considera impuro e sanger di e aliansa, pa medio di cual e a wordo santifica,y a insulta e Spirito di gracia? (Hebreonan 10:28-29).
Pasobra den caso di esnan cu un tempo a wordo ilumina, y cu a purba e don celestial,y cu a bira participante di Spirito Santo, y cu a purba e bon palabra di Dios y e podernan di e siglo cu ta bin. Y despues a cay , ta imposibel trece nan bek na repentimento,como cu nan a bolbe crucifica,e Yiu di Dios pa nan mes, y ta pon’E na berguensa publico.( Hebreonan 6:4-6).
Ora e palabra di Dios ta bisa nos pa no stima e mundo y e cosnan di mundo, ora e palabra di Dios ta bisa nos cu amistad cu mundo ta enemistad cu Dios, ta nifica cu nos mester rechasa e cosnan cu e sistema di mundo ta ofrece:
E maldad,
E perversidad,
E idolatria ,
E malicia.
E buracheria,
E parandiamento,
Y tur otro clase di bagamunderia cu tin den mundo, pasobra esey ta stroba nos di biba pa Dios y di tin Cristo Hesus na prome lugar.
No tin nada scondi,cu lo no wordo revela,y nada scondi cu hende lo no haña sa, pesey tur loke boso a papia den scuridad lo wordo tendi den claridad. ( Lucas 12:2).
E wowonan di Señor ta tur caminda, vigilando malo y bon. ( Proverbionan 15:3).
Curason di tur hende mester arepenti dilanti Dios.
Sinceramente, Pastor Marcel Balootje
