Hesus a bisa den Mateo 11 :28: Bin serca mi tur cu ta cansa y carga y lo Mi duna boso sosiego.
Ningun hende no por cambia su mes, tur hende mester bini na Cristo Hesus pa nan alma por wordo salba, pa nan por kere den Cristo Hesus, y ricibi bida eterna manera ta para scirbi den Juan 3:16.
No lubida cu ta Dios mes a duna Su Yiu unigenito pa ken cu kere den dj’E no bay perdi ma tin bida eterno. Esun cu kere lo ta salba,ma esun cu no kere lo ta condena, pasobra e no a kere den e Yiu di Dios.
Palabra di Dios ta bisa den Romanonan 3:23 : Pasobra tur a peca y ta falta e Gloria di Dios.
Y ta pesey nos mester di e Salbador Cristo Hesus den nos bida.
Si bo sinta warda te dia bo stop di bebe, droga, adultera, fornica, homosexualismo, lesbianismo, criminal, pedofiel, abusador pa bo bini na Cristo Hesus nunca bo bida lo cambia, bo tin cu bini manera bo ta y Cristo Hesus lo cambia bo bida.
Ningun hende por cambia nan mes , no laga ningun hende ganjabo, pasobra esey ta un mentira del diablo cu tin hopi hende mara den scuridad, pensando cu nan por sali riba nan mes.
Salmo 103:3 ta bisa nos bon cla, cu Senjor ta pordona tur nos inikidatnan, Kende ta cura tur nos malesanan.
Ningun hende tin mester di keda den nan pica, inmoralidad sexual, sensualidad, y bisa cu no tin pordon serca Dios, pasobra Dios ta pordona tur hende cu arepenti y aparta for di pica.
Palabra di Dios ta bisa den 1 Juan 1:9; Cu si nos confesa nos picanan E ta fiel y husto di pordona nos nos picanan y libra nos di tur inhusticia.
Confesion ta trece liberacion, mental y spiritual, mientras cu nos no confesa nos pica , nos chens pa ripiti mesun maldad ta grandi, pesey nos mester arepenti, confesa y aparta for di pica, y asina e enemigo no tin gara riba nos.
Pesey sali for di meymey di nan y separa boso mes, Senjor ta bisa, y no mishi cu loke ta impuro,y lo Mi ricibi boso.(2 Corintionan 6:17).
Dios ta odia, orguyo, redo, mentira y falsedad,hipocrecia, crimen y tur otro maldad.
Laga e malbado bandona su caminda,y e hende inhustu su pensamentonan, y lage bolbe serca Senjor, y E lo tin compasion cune, y serca nos Dios, pasobra E lo pordona abundantemente.( Isaias 55:7).
Esun cu sconde su pica lo no prospera, ma esun cu confesa y laga nan lo hanja misericordia.( Proverbionan 28:13).
Esun cu cana den rectitud lo wordo salba, ma esun cu ta perverso den su camindanan lo cay diripiente. ( Proverbionan 28:18).
Dios ta desea pa tur hende wordo salba, y yega na conocemento di e berdad.Dios no kier pa ningun hende bay perdi.
Perversidad di hende ta hiba na pleito, y hacimento di redo ta separa amigonan.
Ningun hende por salba su mes , Cristo Hesus ta e unico caminda di berdad y bida, ni un hende por yega serca e Tata si no ta pa medio di Cristo Hesus.
No tin pordon di pica sin no tin arepentimento, ni tampoco si no tin confesion, pasobra tur hende mester confesa cu nan boca, y kere den nan curason cu Hesus Cristo ta Senjor.
Nos ta bibando den un tempo caminda maldad y inmoralidad kier tuma over, y ta un berguensa pa wak cuanto hende ta apoya maldad, haciendo manera ta algo normal, cu no ta haci danjo. Sinceramente , Pastor Marcel Balootje
