E spirito di manipulacion ta moviendo pa hopi tempo riba e mundo aki.
Eva a wordo manipula door di e colebra, cu e consecuencia cu tanto Adam como Eva a cay den pica y asina perde nan derechi di permanece den paraiso. Y asina pica a drenta mundo.
Manipulacion no ta di Dios e ta bini di e enemigo di e mundo di scuridad.
Ora e spirito di manipulacion drenta hogar, bida, matrimonio y famia , si e no wordo reprende cu e palabra di Dios den nomber di Cristo Hesus e ta causa hopi danjo, pasobra e ta parti di e trikinan di diabel.
Nunca manipula cu locual Dios a duna bo, ni tampoco e posicion cu bo tin den bo bida.
Nunca manipula bo famia financieramente, djis pasobra bo tin y nan tur ta depende di bo.
Nunca usa bo curpa y bo buitesa pa manipula hende, pasobra tur eseynan ta temporal.
Nunca usa placa pa manipula hende, pa mantene hende abao, pasobra ta yega un dia cu placa ta caba.
Nunca sinja bo yiu manipula su enamorado , pa hanja cos for di dje pa yuda cas, pasobra bo ta baha balor di bo yiu, y bo ta danja e relacion completamente.
No ta pasobra bo tin conocemento, bo tin cu manipula otronan, pa asina nan tin cu warda riba bo te dia abo kier yuda nan.
No trece manipulacion sexual den bo matrimonio, pasobra asina bo ta invita adulterio y tur clase di inmoralidad.
Nunca manipula bo mayornan pa placa, pasobra esey tambe ta nifica ladronicia, y bo no ta honra bo mayornan.
Tur cos cu hende logra pa medio di manipulcion e no lo gosa di dje, pasobra ta algo mal hanja.
No lubida , e colebra ( satanas ) a manipula Eva y Adam.
Jacob cu yudansa di su mama Rebeca a manipula su tata Isaac pa asina horta bendicion di su ruman Esau.
Dalilah a manipula e pober Samson cu a stima Dalilah, pero Dalilah no tabata interesa den amor, pero den e placa cu e ta bay ricibi ora e entrega Samson.
Pesey tur hende homber mester haci tur locual ta posibel pa no cay den e trampa di prostitucion, Huy for di inmoralidad.
Jezabel a manipula Naboth pa Naboth su tereno cu Naboth no kier a bende, y asina kita e homber su bida.
E Fariseonan a purba tur manera di manipula Hesus, pero nan a faya , pasobra Hesus tabata sa kico ta biba den nan curason.Pesey den tur momento Hesus tabata reprendenan y asina nan por a repenti di nan manipulacion.
Manipulacion y mentira ta cana hunto,manipulacion ta nifica usa triki diabolico, pa domina hende, saca probecho, haci donjo riba locual no ta di bo, hunga hefe y na final bo ta resulta cu bo no tin nada, pasobra esun cu ta anda malo ta caba na malo.
Nunca manipula bo pareha cu bo ta bay lage, pasobra e no kier laga bo haci locual cu bo kier.
Nunca manipula bo yuinan , pasobra bo tin autoridad riba nan, haciendo abuso, verbal y fisico.
Nunca pensa cu abo ta mihor, e ultimo refresco den un desierto y cu tur hende mester di bo, pasobra tur hende ta reemplasabel, ta solamente Dios no por wordo reemplasa.
Lo no pasa nada malo cu e husto, ma e malbadonan ta yen di problema.( Proverbionan 12:22).
Hende manipulador tur ora ta den problema, pasobra nan no tin pas y trankilidad, pasobra nada di locual cu nan tin no ta pertenece na nan.
Mantene manipulacion, mentira y egoismo, leu foi bo.
Sinceramente, Pastor Marcel Balootje
