Bijbel Exodo 24: 7 – 8, den e Evangelio aki, Dios Tata a sera e prome Aliansa cu e pueblo di Israel, pa medio di Moises. Bijbel 2 Samuel 7: 16, den e Evangelio aki, Dios Tata a eligi David, cu ta e prome Rey di Israel. Dios Tata a priminti Rey David cu su sucesornan, nan lo ta pa semper encabesa e Reino di Dios. Pero awor e promesa aki a wordo verifica den Cristo-Hesus, cu ta e Aliansa nobo di Dios Tata cu e pueblo di Israel. Bijbel Mateo 26: 26 – 28: “Mientras nan tabata come, Hesus a tuma e pan, El a gradici Dios. Despues El a tuma e copa di binja, a jama Dios danki pa e copa y a pase pa Su apostelnan, bisando: Boso tur bebe for di dj’e, esaki ta Mi Sanger, e Sanger cu ta confirma e Aliansa cu Mi ta derama pa hopi hende, pa pordon di pikanan.” Akinan Cristo-Hesus ta confirma Su sacrificio y morto na crus, deramando Su Sanger precioso pa e Aliansa Nobo di Dios Tata a cera cu e pueblo nobo di Israel. Bijbel Lucas 1: 32-33: “Senjor Dios lo dun’E e trono di Su antepasado David y te den eternidad lo E ta Rey di e descendientenan di Jacob y Su Reino lo no tin fin.” Bijbel Mateo 16: 15-19: “Hesus a puntra Su apostelnan: Anto boso mes, ta ken boso mes ta bisa Mi ta? Simon a contesta: Bo ta e Mesias, E Yiu di Dios bibo! Hesus a bis’e: Felis bo ta Simon yiu di Huan, pasobra no ta hende a revela bo esaki, ma Mi Tata cu ta den Cielo. Mi ta bisa bo: Abo ta Pedro (osea baranca) y riba es baranca aki lo Mi lanta Mi Iglesia y forsanan di fierno lo no podera di dj’e. Lo Mi duna bo e yabinan di Reino di Cielo y loke bo prohibi na tera, ta prohibi den Cielo tambe y loke bo permiti na tera, lo permiti den Cielo tambe.” Akinan Cristo-Hesus ta bisa bon cla, Mi Iglesia, osea un solo iglesia y no iglesianan. E demonionan a lanta diferente sectanan na mundo, pa purba kibra e unico Iglesia di Cristo-Hesus, pero nan lo no logra. Hesus a duna Simon e nomber Pedro, cu ta significa baranca, cabes visibel di Iglesia di Cristo-Hesus. Hesus a duna Pedro e yabinan y esaki ta significa, sera of habri portanan y esey ta e portanan di Reino di Cielo. Hesus ta abasa riba e fundeshi di Su Iglesia, Su apostelnan cu nan sucesornan, nan lo ta pa semper lidernan di e Aliansa Nobo. Hesus a duna Su apostelnan cu nan sucesornan e autoridad Divino, pa habri e portanan di Cielo y invita e humanidadnan di mundo pa drenta. Hesus a duna e autoridad na Pedro, di prohibi na tera, lo ta prohibi na Cielo tambe y di loke ta permiti na tera, lo ta permiti na Cielo tambe. Esaki ta e autoridad disciplinario, si ta necesario excomulga, desobediencia na Iglesia. Y tambe pa bin cu e Leynan codigo canonico di Iglesia etc. E unico Iglesia di Hesus mester ta universal, Bijbel Marco 16: 15-16 ta bisa: “Hesus ta bisa Su apostelnan: Sali pasa na henter mundo y predica e Evangelio pa henter humanidad. Esun cu kere y ta bautisa, lo ta salba, ma esun cu no ta kere, lo ta condena.” E palabra, sali pasa pa henter mundo y predica e Evangelio pa henter humanidad, ta significa Universal, kiermeen Iglesia Universal. Hesus ta bisa Su apostelnan, Bijbel Mateo 28: 20: “Lo Mi ta cu bosonan tur dia, te na cabamento di mundo.” Tambe Hesus a establece pa Su Iglesia Universal, e 7 Sacramentonan obligatorio di Dios Spirito Santo, pa ricibi gracianan di salbacion, segun Bijbel. Bautismo, Mateo 28: 19-20. Confirmacion, Echonan di Apostelnan 2: 1-4. Confesion, Huan 20: 23. Eucaristia, Lucas 22: 19-29. Matrimonio, Mateo 19: 4-6. Orden Sacerdotal, Marco 3: 13-15. Enfermonan, Hacobo 5: 14-15. Mester compronde bon, cu e unico Iglesia Universal di Cristo Hesus, ta e pueblo nobo di Israel. Hesus ta bisa bon cla, Bijbel Marco 16: 15-16, haci henter humanidad di mundo bira Mi discipelnan y bautisanan, akinan nos mester compronde cu hasta e hudiunan mes mester drenta den e Iglesia Universal di Cristo-Hesus, pa nan por drenta den e Reino di Dios. Tur esnan den Iglesia Universal, nan ta pertenece na e pueblo nobo di Israel di Dios Tata, pa drenta den e Gloria Eterno. Esnan cu no ta kere y cu no ta bautisa, nan lo ta condena.
Scirbi pa Seferino Tromp.
